Kadaugan ni Duterte

Seguradong mabulukon ang mensahe ni Presidente Rodrigo Duterte sa umaabot nga state-of-the-nation-address (Sona) alang sa iyang unang tuig isip pangulo sa nasod human sa lab-as nga kadaugan sa hukom sa Supreme Court (SC) diin mayoriya sa mga miyembro niini ningboto pabor sa pagdeklarar og martial law sa Mindanao atol sa en banc session kagahapon.

Ang 11 ka justices nipabor sa pagsalikway sa consolidated petitions samtang, ang tulo ka magistrates nga sila si Chief Justice Maria Lourdes Sereno, Senior Associate Justice Antonio Carpio ug Associate Justice Alfredo Benjamin Caguioa uyon apan nagtuo nga ang martial law kinahanglang limitado sa pipila ka mga dapit sa Mindanao. Bugtong si Associate Justice Marvic Leonen supak sa martial law.

Ang SC namati sa consolidated petitions nga gipasala sa grupo sa oposisyon sa Kongreso ubos sa pagpangulo ni Albay Rep. Edcel Lagman, mga aktibista ug mga militanteng magbabalaud ug upat ka mga babaye nga taga dakbayan sa Marawi, ang dapit nga giokupahan og kadali sa teroristang Maute group niadtong Mayo 23 apan giabog sa militar hinungdan sa pagtumaw sa kagubot ug krisis sa pagpamakwit sa mga residente sa malambuong dakbayan.

Ang petitioners ug ang Office of Solicitor General gihatagan og higayon sa pagdepensa sa ilang mga posisyon sulod sa tulo ka adlaw nga oral arguments nga nitapos sa closed-door briefing ni Defense Secretary Delfin Lorenzana ug Armed Forces chief General Eduardo Año niadtong Hunyo 15.

Sa pagpahibalo sa kukom sa publiko, ang tigpamaba sa SC nga si Theodore Te wala na mobutyag sa basihanan sa kukom sa labing taas nga hukmanan.

Ang mga akibista nga nagkatapok sa gawas sa SC ubos sa pagpanguna sa Bagong Alyansang Makabayan pulos nahuyhoy ang ilang abaga sa kapildihan ug ang mga pabor sa administrasyon nagmaya sa hukom sa SC.