Bisan kon pildi si Manny CUENTAS CLARAS

Kon diha pay pustaanay, seguradong pildi ko. Mapildi ko kay adto man unta ko mopusta ni Manny Pacquaio kay dehado ang away niya batok kang Jeff Horn kaniadtong miaging Dominggo.

Apan, migawas nga dehado diay batok ni Manny.

Tiaw bay wa may klaro ang nag- referee sa away, pasagdan man lang nga magkalingaw ug gakos og tuok si Horn ni Manny. Wa gani mo- warning. Gani, diha pa siyay gisulti nga “I’m here to protect you” ngadto kang Horn human niya sultii nga angayan mopakita siya nga moaway pa kay kon dili, undangon niya ang away human sa round 9.

Pildi si Manny sa away tungod kay ang 3 ka huwes mipabor sa ilang resulta ngadto kang Horn.

Gani, unanimous ang maong desisyon. Apan sa electronic nga statistics diin gi-kwenta ang gidaghanon sa sumbag, sumbag nga nakaigo og solid nga sumbag, makita nga pabor kaayo ngadto kang Manny.

Pasabot, midaog si Manny sa statistics apan napildi sa mga huwes.

Matod pa ni Manny, walay problema ang mga huwes, ang problema ang referee nga morag wa pay kasinatian.

Matod pa niya walay problema kon hugaw nga modula si Horn total duna may referee.

Apan makita, matod pa niya, nga gipasagdan lang sa referee si Horn sa kanunay niining pagtuok og pag-gakos kaniya.

Angayan unta, midugang pa siya, nga warningan si Horn.

Bisan gani ang pag- head butt ni Horn nga maoy hinungdan nga midugo ang iyang ulo, dugang pa niya, angayan nga warningan niya si Horn.

Apan mi-respeto siya sa desisyon sa mga huwes, mitataw si Manny.

Mao ni problema kay dili ikalimod nga dakong sugal ang boxing.

Daghan ang nagtuo nga basin gibaligya ang maong away, total duna may re-match nga gisabotan sa ilang kontrata. Unsa may ilang rason? Matod pa, dehado si Horn sa wala pa ang dula.

Kon sa sabong pa sa manok, Inilog si Manny og biya si Horn.

Kon dunay pustaanay, mas daghan ang mopusta ni Manny kay ni Horn.

Tungod niini, gamay ang daog nga kwarta kon si Manny ang modaog apan dako ang daog kon si Horn ang modaog sa away.

Sa mga sugarol pa, mas moangay sila og modaog si Horn kay ni Manny kay dako man ang ilang masapi. Bahala na ang bakos nga gihuptan ni Manny as world welterweight champion total lisod na pildihon ang iyang gihuptan nga record nga 8 ka mga bakos sa lain-laing timbang.

Rigged ang dula, matod pa sa usa ka taga USA nga mitan-aw.

Unsa kahay tinuod niini?

Bisan pa sa iyang kapildihan, nagpabilin nga bilyonaryo si Manny.

Bisan pa kon pildi si Manny, nagpabilin siya nga popular sa mga katawhan.

Bisan kon pildi si Manny, daghan ang nagtuo nga sayon ra gihapon siyang modaog sa eleksiyon pagka-senador sa sunod piniliay.

Bisan kon pildi si Manny, nahimong popular kaayo ang dula nga boxing sa mga Pinoy og maoy hinungdan nga zerogyod sa tibuok nasod kon modula na si Manny.