You should know by now

Nagkagrabe ang pagka seluso ni Derwin sa misunod pa nga mga adlaw. Kanunay na siyang mangaway nako. Miabot ang punto nga wa na ko kaagwanta.

“Gubot ang atong relasyon, Win. Wa kay pagsalig nako.

Give up na ko.” “Aw, mao man kahay imong gusto. Buwag gud. Kadaghang babaye, ah!”

Migawas gyud ang tinuod nga kolor ni Derwin. Wa niya ipakig-away ang iyang gugma nako. Yano lang siyang misugot nga magbuwag mi. Gipalabi niya ang iyang pagka selfish. Mas grabe pa siya ka abubhoan nako ug kang Ray. “Sige. buwag na ta.” Wa na ko maghuwat sa isulti pa ni Derwin. Migawas ko sa gisudlan namong snack bar. Wa koy lingi-lingi nga mibiya niya. Sa nalayo na ko, mihunong kog lakaw ug gilingi ko si Derwin. Wa siya mosunod nako. it means nga wa siyay interes nga makigsulti pa siya nako. Mipadayon ko paglakaw paingon sa huwatanan kog sakyanan sa pagpauli.

Usa ka hapon sa Domingo nga gikan ko sa simbahan, hapon man gyud ko manimba sa Cathedral, naglakaw lang ko paingon sa Colon. Wa ko modiretso sa pagpauli kay duna koy paliton sa suki kong Mall. Wa lang nako damha nga masundan ko si Ray nga naglakaw sab. Duna siyay kuyog nga babaye, tingali girlfriend niya. Kabalikon ko sa akong agi aron sa laing dalan ko moagi.

Apan nadungog ko ang isog nga tingog sa babaye. Duol ra man gud ko nila.

“Unsa ka man, Ray, nga sige mag estorya og mga babaye sa

campus? Mga uyab nimo sila, no?”

“Naunsa ka man, Shiela, nga friends ko man lang sila?”

Nasuko sab si Ray. Nainteres ko sa pagpaminaw pa sa ilang estoryahan. Wa man say lingi-lingi si Ray maong wa ko niya makita.

“Ah, di ko motuo. Malipayon ka man lagi kaayo. Unya, mohapak-hapak pa ang mga babaye sa imong bukton. Sus, kaayo gyung bugnuon ninyo, uy!”

“Hunong na gani anang imong pagduda nako, uy, Shiela!”

“Di na ko kaagwanta nimo, Ray. Playboy kaayo ka. Magbuwag na ta!”

“Aw, mao man kahay imong gusto. Sige magbuwag ta!”

Mipaturatoy paglakaw ang babaye. Nagdali siyang mibiya kang Ray. Milingi si Ray ug nakita ko niya. (SUMPAYAN)