Gamhanang sungkod

Adlaw nga Sabado. Bugnaw ang panahon karong buntaga. Nag-ambahan ang mga Senior Citizen dinhi sa barangay Quiot padung sa eskuylahan aron mokubra sa pinansyal nga hinabang gikan sa siyudad.sa Sugbo.

Wa ko paiwit. Bisan lisod ang akong paglihok ug paglakaw naninguha kog lakaw gamit ang sungkod aron makaabot sa eskuyahan. Kontra man sa atraytis ang bugnaw nga panahon apan gikalipay nako. Napul-an na ko sa igang nga panahon nga kanunay nakong giantos sa daghang semana nga nanglabay.

“Sir, kupot sa akong bukton, dangog ra ba ang hagdanan,” sugyot sa usa ka Senior Citizen nga pareho nako nga buot sab mokubra.

“Salamat kaayo, Ma’m,” matod ko human mobuhi sa bukton sa babaye.

Apan nakurat ko sa pagbuhi nako sa bukton sa babaye. Nakit-an ko sa higala nakong magsusulat ug magbabalak. Giandam ko akong kaugalingon sa laing sungog nga akong maangkon gikan sa higala kong si Cesar.

“Bay Rael, gamhanan man diay gihapon imong sungkod. Gwapa man lagi kadtong imong kuyog!” timbaya ni Cesar.

“Senior Citizen sab kadto siya, Bay Cesar. Nganong naabot god ka dinhi sa among barangay?” Ako siyang gisukna.

“Aduna koy interbiyuhon alang sa akong kulom sa sunod semana,” tubag ni Cesar.

Dali ra nakong nadawat ang pinansyal nga hinabang. Prayoridad kaming adunay balatian sa panglawas. Igo ra kong gipalingkod sa daplin ug gitunolag kwarta sa paymaster.

Apan wa dayon ko molakaw human makadawat. Nagpabilin ko sa akong gilingkuran. Nalipay ko nga nakita si Cesar. Gusto kong sutaon si Cesar nganong tawgon niya akong sungkod nga gamhanan.

Si Cesar ang tistisan sa pundok namong mga magsusulat. Nagsugod ang sungog ni Cesar dihang nagsaulog si General Alex Abadinas sa kasumaran sa adlaw niyang natawhan. . Usa usab siya ka magsusulat sa balak ug sugilanon. Daghan na siyang ganti nga nadawat sa tigi sa sinulatay. Mao nga dili mahikalimtan ni General Alex ang mga magsusulat nga imbitahon kon aduna siyay okasyon.

“Bay Rael, gamhanan man diay kanang sungkod, mo,” unang sungog ni Cesar nako.

Wa ko katingog sa sungog ni Cesar. Ako na lang gipaminaw ang katawa nilang John Tam, Priscel, Nar, Tisoy, Marife, Samuel, Gilbert, Jeffrey ug ubang magsusulat nga mitambong. Gisundan pa sa daghang higayon ang among panagkita ni Cesar. “Gamhanang sungkod,” pulong ilitok ni Cesar matag kita namo.

Bisan sa sungog ni Cesar nako, wa koy kalagot niya. Malingaw ko sa iyang mga komedya. Ug kanunay ko niyang pahinungdan sa tulumanon niya sa radyo.

“Bay Rael, wa pa man lagi ka mouli? ”ni Cesar nga miduol nako.

“Nalipay kong nakita ka, Bay Sar. Gusto kong masayod kon nganong nakaingon ka nga gamhanan akong sungkod?” gisultian ko siya.

“Abi nimo, Bay Rael, human ka mabiyudo, wa ko na ikaw makita nga nagpakabana sa tsiks. Apan dihang migamit na ka sa imong sungkod sukad niadtong adlaw sa heneral, daghang tsiks gusto mogunit sa kamot nimo bisan asa ka nako makita,” ni Cesar nga nagkatawa.

Nahimuot ko sa gisugilon ni bay Cesar nako. Ug nahinumdom ko sa mga babaye nga mitanyag sa ilang tabang aron ako makalabang sa mga dalan sa siyudad, labi na sa Colon ug Junquera. (KATAPUSAN)