CEBU ANNIVERSARY RUN PORMAL GILUSAD

Aron pag-agni og daghan partisipante, ang Cebu Provincial Sports Commission (CPSC) misiguro nga dili ma conflict sa laing running event ang pagpahigayon sa 448th Founding Anniversary run nga gikatakda karong Agusto 27 diha sa Cebu Provincial Capitol.

Kini maoy leksiyon nga nakuha sa miaging tuig, diin ang maong event nahidungan usab sa pagpahigayon sa University run sa Mandaue City.

“This year we ensure that the run would not coincide with another running event. We expect more participants

this time,” matod ni CPSC executive director Atty. Ramil Abing atol sa press conference ug launching kagahapon.

Si Lyle Larida sa CPSC mitug-an nga iyang nang nakompirmar ang petsa sa University run nga dili ra usab madungan sa ilang event.

Ang fun run, nga karon anaa na sa ilang ikatulong tuig, langkuban sa 20-kilometer ug 10 kilometer nga abli sa tanang mga runners samtang ang grassroots category mosubay sa tulo ka kilometro nga rota.

Aduna usay alang sa mga Capitol employees nga 3k ug

5k run.

“The registration for the grassroots kids is for free. There will be 200 grassroots from (Sisters of Mary) Girlstown and 200 from Boystown,” padayag usab ni CPSC Commissioner Nimrod Quiñones. Sa 20-k men’s ug women’s

division, ang top three makadawat og P10,000, P7,000 ug P5,000 samtang ang nagunang tulo usab sa 10K makabulsa og P5,000, P3,000 ug P2,000.

Ang makampyon sa 5K ug 3K capitol employees division mouli usab nga may dala tag P5,000 matag usa samtang P2,000 alang sa mga modaog sa boys’ and girls’ 3K grassroots.

Ang registration fee mokantidad og P500 alang sa Open 20K ug P300 Open 10K lakip na niini ang singlet.

Nagpadayon na karon ang pagpangrehistro diha sa CPSC office sa Legislative Bldg, Capitol Compound. Sa laing bahin, ang CPSC mopahigayon og Cebu Province Futsal Tournament sa Aug. 18 ngadto sa 20 sa Argao Sports Complex.

Ang divisions mao ang girls’ U18, boys’ 15-under, girls’ 15-under ug mixed U-11.