Guv's Cup title target sa Mingla karong gabii
Ang pagtapos sa series ug paglangkat sa kampyonato sa 1st Cebu Governor’s Cup Inter-cities/municipalities basketball tournament maoy anaa karon sa alimpatakan sa Minglanilla Archangels a dihang mosulong kini karong gabii sa teritoryo sa Consolacion Sarok Weavers alang sa Game Two sa best-of-three finals. Ang Archangels ni coach Edito Salacut nga wa pa makatilaw
og kapildihan gikan sa pagsugod sa quarterfinals
round sa South division, maoy miangkon sa Game One niadtong Dominggo, 77-71, nga didto ra usab duwaa sa Minglanilla Sports Complex.
Sugdan sa alas 7 sa gabii ang panag-engkuwentro diha sa Consolacion National High School gym nga gipaabot nga saksihan sa mapuot nga mga dumadapig. Anaa man tuod nila ang
homecourt advantage apan malisod nga tahas ang sagubangon sa Consolacion human duha sa ilang starters nga sila si JC Escalonea ug Cyril Sabellana ang kadudahan kon makaduwa ba karong gabii.
Si Escalona na- injured sa Game One human sa grabing pagpangbikog sa iyang batiis nga gani dali kining gidala sa ambulansya ngadto sa tambalanan samtang si Sabellana ang nakaangkon og angol sa iyang tuhod sa Gaem 3 semifinals round sa North District batok sa Mandaue City.
Hinuon alang ni coach Salacot nga way luna sa kompiyansa ang gusto niyang ipahaom ngadto sa iyang mga batos.
“Di gyud ta angay mokompiyansa kay kini atong kontra mao ra ni nakapildi sa pinakalig-ong team sa tournament nga mao ang Mandaue City,” matod ni Salacut.
Kon padayon nga di makaduwa sila si Escalona ug Sabellana, si Consolacion coach Jun Pepito mosandig ngadto nila ni Emmanuel Villamor, Patrick Wilso Yu, Froiland Maglasang ug Patrick Montano.
Samtang sa pikas bahin, mangulo sa Archangels mao ang managsuong sila si Mark Glenn ug Mark Justine Nebris, Jesiel Tarroza, John Mangarong ug Kevin Quimson.