RP maayog kombate sa trafficking
Sud sa duha ka sunodsunod nga higayon, nagpabilin ang Pilipinas sa Tier 1 sa kampanya pakigbatok sa human trafficking sa labing uwahi nga report sa Trafficking in Persons sa Estados Unidos nga gipagawas niadtong Hunyo 27.
Si Justice Assistant Secretary Juvy Ramirez Manwong nipahibawo niini sa iyang pakigpulong kagahapon atol sa duha ka adlaw nga National Conference on Combating Trafficking in Persons sa Montebello Villa Hotel, siyudad sa Sugbo, nga nagdala sa tema nga “Mainstreaming Our Efforts in Combating Human Trafficking Restoring Human Dignity.”
Matod ni Manwong ang pagpabilin sa nasod sa Tier 1 nagpasabot nga padayon kini nagtuman sa mga rekisitos sa Trafficking in Persons Protection Act sa Estados Unidos.
Kauban sa Pilipinas sa Tier 1 ang mga nasod sama sa New Zealand, Japan, Taiwan, South Korea, ug United Kingdom ingom man United States ug Australia.
Si Manwong namulong nga gumikan niini pabilin gihuptan sa nasod ang position isip lider sa kampanya batok human trafficking sa Southeast Asian regions gumikan sa mga paningkamot sa nagtinabangay nga mga ahensiya sa gobiyerno ug non-government organizations.
“I see that the roots of partnership have deepened over time and space, and this, I think, is crucial to our continued success,” pahayag ni Ramirez. Sa iyang visual presentation, si Atty. Rey Inciong, assistant city prosecutor sa Department of Justice sa Manila, nibutyag nga gikan sa 103,796,838 ka mga tawo sa Pilipinas, 413,112 niini ang mga nabiktima sa trafficking.