Angayan molingkod ang BOPK: Tomas
Human way nahitabong reorganization sa konseho sa dakbayan sa Sugbo atol Inaugural Session niadtong nakalabay nga Martes.
Matod ni Cebu City Mayor Tomas Osmeña nga angayan lang nga molingkod ang konsehal nga sakop sa Bando Osmeña Pundok Kauswagan (BOPK) isip chairman sa nagkadaiyang komitiba sa konseho.
Dugang ni Osmeña nga tungod sa nahitabo sa konseho sa siyudad nga hangtod karon bakante gihapon ang mga committee chairmanships sa konseho, makaparalisar kini sa trabaho hilabi sa may labot sa paggahin og pundo.
Ang BARUG Team Rama councilors nikwestiyon sa tukma nga majority votes tungod sa desisyon sa Korte Suprema nga iapil sa ihap ang presiding officer pagtino sa mayoriya.
Si Osmeña mihulagway nga gi-manipulate ug mihimo matod pa og kaugalingong interpretasyon ang Barug Team Rama diin ang minority mao na hinuoy nahimong mayoriya dungan sa pagbutyag insulto kini sa demokratikanhong proseso.
Apan si konsehal Jose Daluz III, kaalyado sa Barug Team Rama, miingon nga atol sa ilang caucus meeting uban sa mga konsehal sa pikas grupo giingong nauyunan na nila kon unsay mahitabo sa annual organizational session.
Dugang niini nga nasayod na ang mga konsehal sa BOPK nga ingon niini ang mahitabo ug ilang giinsister nga ang 10 votes ug si Vice Mayor Edgardo labella mo-rule sa pag-deny sa mosyon aron aprubahan ang sa election sa committee.
Gani matod pa gisultihan nila si Konsehal Margarita Osmeña nga mo-object lang sa ruling sa bise mayor aron mahatagan og remedyo sama sa pag-adto sa DILG o kaha sa korte aron pagsulbad sa isyu kalabot sa 10 votes.
Gipasabot ni Daluz nga kinahanglan nila moinsister niini kay mao man kini matod pa ang naa sa balaod ug di usab nila kini mahimong piyungan lang dungan sa pag-ingon nga sa iyaha lang itugyan na niya ang committee chairmanship sa pikas sanglit ang tanan moagi man lang gihapon sa konseho.
Si Konsehal Sisinio Andales nga kaalyado sa BOPK mihulagway sa mga konsehal sa Barug Team Rama nga mga obstructionist ingon man anti-poor apan gikontra kini ni Daluz kay matod pa obstructionist sila wa unta nila aprubahi ang 93-1 ingon man ang pagbaligya sa tulo ka ektaryang luna sa South Road Properties.
Di hinuon kasulti si Daluz kon legal o ilegal pa ang buhaton sa mga konsehal sa BOPK nga mo-function na sa ilang mga tagsa-tagsa ka committee chairmanship apan kini miasoy nga dili unta angay buhaton tungod kay kalapasan sa house rules.