Underwater cave nadiskubrehan
Misugyot ang bise presidente sa Filipino Cave Divers (FCD) Andy Berame nga gikinahanglan nga ideklarar nga protected area ang napalgan nga giingong underwater cave sa Olango channel nga nasakop sa municipal waters sa Lapu-Lapu City.
Matod pa nga gikinahanglan pa nga ipaubos sa biophysical survey ang dapit sama sa pagsusi sa iyang coral cove ingon man ang visual census niini sa di pa madeklarar nga protected area.
“Basig mahibaw-an na sa uban (mananagat) tirohan na diha,” pasabot ni Berame kinsa maoy chairman sa City Disaster Risk Reduction Management Council (CDRRMC).
Sa sayo pa, aksidente nga nadiskubrehan ang usa ka underwater cave diha kadagatan nga gitung-an sa Caubian ug Olango island samtang nagpadayon ang search and retrieval operation sa lawas ni Bien Unido Mayor Gisela Boniel nga gikatahon gilabay sa dapit sukad niadtong Hunyo 7.
Atol niining pagsuwat pabilin nga negatibo ang search apan usa ka langob ang napalgan sa may gilawmon nga 37 – 40 metros kansang diameter sa baba niini adunay tres metros nga gilapdon.
Nasuta nga sandy bottom ug daghan isda nga nagkadaiyang klase ang makita sa langob.
“Dili common nga species sa isda ang naa didto,” tipik sa pamahayag ni P/CInsp. Junnel Caadlawon ang hepe sa Operation Division sa Lapu-Lapu City Police Office kinsa maoy nag-supervise sa diving team sa gihimong retrieval operation sa miaging adlaw.
Si Lapu-Lapu City Mayor Paz Radaza sa iyang bahin buot niya masusi pag-ayo ang langob ug ang posibilidad nga makadugang kini sa atraksiyon sa siyudad isip laing diving spot.
Sa laing bahin karong adlawa maoy katapusang adlaw sa search and retrieval nga motangkod usa ka buwan human nga gipatay ug gilabay ang lawas ni Mayor Boniel sa dapit.