Angay ikiha

Sa uwahing mga anti-drug operations, ang kapulisan nakasikop og mga menor nga tigdala og drugas bugti sa suhol. Dunay usa nga nibutyag nga mokita siya og tag P2,000 sa iyang paghatod sa drugas. Kining mga bataa dunay mga ginikanan nga dali rang makapatarungan nga wa sila masayod nga namaligya og drugas ang mga anak.

Bisan kon ang tipik sa kita ning mga bataa ilang gihatag ngadto sa ilang mga ginikanan nga nagkinahanglan niini tungod kay wa silay trabaho.

Kinsa ba nga ginikanan ang di mahibung ug di mangutana kon ang bata motunol na og kwarta? Duna man gani uban nga drug pushers nga nanggamit sa ilang mga anak sa ilegal nga negusyo.

Sa pagkatinuod, maglisod ang kagamhanan sa paggukod ning mao nga mga ginikanan di tungod kay way balaud niini. Ang rason mao ang kabalaka kon kinsa may mobuhi sa mga bata kon ilang ikiha ug bilangguon. Mao ni ang kalibog sa mga ahensya nga mogukod unta sa mga ginikanan nga nagpabaya.

Kon di makiha ang mga ginikanan, kini nga trend karon sa illegal drugs magpadayon kay sayon ra silang makalusot. Mao na nga inay magkinto ang mga ginikanan kay dunay mga balaud nga magsilot sa ilang pagbaya, mogara na hinuon kay nagtuo silang di mapriso.

Ning kampanya karon sa illegal drugs, gikinahanglan nga mohimo og lakang ang mga buhatan sa kagamhanan aron mahunong kining nagkagrabeng pagpanggamit sa mga menor.

Kon piyungan sa gobiyerno kining matanga sa mga ginikanan, magpadayon ang pagdaghan sa mga menor nga drug courier. Mosamot sila ka paborito tungod kay gawas nga di mapriso, ang mga ginikanan wa magpakabana basta duna silay kwarta.

Kon ang mga ginikanan nga naa sa cyber sex gikiha, unsa may kalainanan ning mga ginikanan nga nitugot nga tigdala ug tigbaligya og drugas ang ilang mga anak? Di lang sila ikiha?