Lalis kalabut sa BRT
Wa akoy tumong ug tuyo nga moapil sa lalis nila ni Cebu City Mayor Tomas Osmeña ug Presidential Assistant for the Visayas Secretary Michael Dino kalabut niining pagpatuman sa Bus Rapid Transit (BRT) dinhi sa Cebu City.
Isip kanhi chairman sa Infrastructure Development Committee (IDC) sa Central Visayas Regional Development Council (RDC VII) sud sa 18 ka tuig, naaprubahan ang maong proyekto sud sa akong pagduma. Ako kining gipresentar sa RDC Full Council nga miaprobar usab niini usa kini giduso ngadto sa National Economic Development Authority (NEDA) Investment Coordination Committee (ICC).
Nadugay kini sa pag-aprobar tungod sa makuting proseso nga giagi-an. Naabtan kini sa balaud nga nagbuot nga ang basihan sa pagbayad sa yuta nga maagian sa road right-of-way (RROW) sa mga proyekto sa gobiyerno mao na ang fair market value, dili na zonal valuation. Tungod niini misaka ang project cost gikan sa P10.6 billion ngadto sa P16.9 billion. Sa ato pa, labaw na sa katunga ang budget sa RROW sa BRT. Gibalik kini ngadto sa ICC technical board nga miaprobar ug miduso niining dugang pundo ngadto sa ICC Cabinet Committee nga modiskutir niini sa Hulyo 21.
Kinahanglang depensahan pag-ayo sa Cebu City kining umento sa budget sa BRT aron mahinayon ang proyekto. Prangka nga pagkasulti nagtuo ako nga dili na mahinayon kining maong proyekto labina sa Aquino administration. Uyon akong ipatuman kining BRT ug Light Rail Transit (LRT) dinhi sa Cebu. Sa pagkakaron hinuon maorag mas una nga mapatuman ang LRT.
Onse ka mga mahistrado sa Korte Suprema ang mihukom nga legal ang pagproklamar ni Presidente Duterte og martial
law sa tibuok Mindanao. Tulo, apil na si Chief Justice Marial Lourdes Sereno, ang miuyon sa martial law apan nagtuo sila nga alang lang unta kini sa Marawi City. Sa 15 ka mga sakop sa Supreme Court usa lamang ka mahistrado, si Associate Justice Marvic Leonen, ang supak sa martial law. Nagpakita kini nga dili tinuod ang pasangil sa mga kritiko ni Pres. Duterte nga walay rebelyon didto sa Marawi City kay terorismo ra kuno.
Sigun sa akong gihisgutan sa milabay nakong lindug nga klarong rebelyon ug dili lamang terorismo ang gihimo sa Maute group inabagan sa Abu Sayyaf ug Bangsamoro Islamic Freedom Fighters (BIFF).
Hinaut pang maghiusa na kitang tanang Pilipino aron pagsulbad sa problema sa Mindanao inay nga magpadayon sa pag-uyog sa Duterte Administration.
Angayan lang nga ipatuman na ang Republic Act 7610 kon Special Protection of Children Against Abuse and Exploitation, Discrimination Act. Sa kadaghan nang hidakpang minor de edad wa pa ko makadungog nga dunay ginikanan nga nasilotan sa ilang pagpabaya.