Coco batok Vice sa MMFF

Mga pahalipay sa dakbayan sa Carcar sa pagsaulog sa ika10 nga kasumaran sa pagkatukod niini isip dakbayan karong adlawa. Dungan niini, inugurahan usab ang bag-ong city hall sa dakbayan.

Kagahapon, gipahigayon ang Festival of Festivals isip kabahin sa kasaulogan.

○○○ Samtang ang ubang mga artista sa Kapuso Network nilayat sa kaatbang nga teritoryo, si Solenn Heusaff nagpabiling contract star sa maong network.

Bag-o lang nipirma og bagong kontrata ang gwapang actress-model. Gipaabot nga mas molambo pa ang career ni Solenn ubos sa bag-ong kontrata.

○○○ Pipila sa atong mga higala sa media niuli nga nagbitbit og android TV ug bag-ong cellphone sa niaging Biyernes. Nidaug sila sa raffle nga gipahigayon sa kalihukan sa Globe Telecom sa Ayala Center Cebu Terraces diin gilunsad ang Globe At Home nga nipakusog pa sa mga LTE sites sa kompaniya.

Atol sa kalihukan, gipakita ang pila ka mga pelikula sama sa Love Is Blind nila ni Kiray Celis, Derek Ramsay ug Solenn Heusaff ginamit ang mga kahimanan sa YouTube, Netflix ug uban pa.

○○○ Naapiki sa panahon ang mga artista sa Bloody Crayons sa Star Cinema mao nga imbes mobisita sa Cebu, online interview na lang ang gipahigayon ni Promo Diva Josie Pereyra.

Sila si Elmo Magalona, Janella Salvador, Yves Flores, Ronnie Alonti ug uban pa ang mga bida. Karong Miyerkules, Hulyo 12, isalida ang Bloody Crayons.

○○○ Kon nagkauban sila si Coco Martin ug Vice Ganda sa niaging proyekto nga giapil sa Metro Manila Film Festival (MMFF), ning umaabot nga Disyembre, magkompetinsya ang duha tungod kay duna silay iya-iyang proyekto.

Si Vice ang bida sa The Revengers samtang si Coco, di lang kay bida kon di prodyuser ug direktor pa gyud (bonggangbongga ha!) sa pelikulang Ang Panday nga gipasikat kanhi sa Da King nga si Fernando Poe Jr.

Kauban ni Vice si Daniel Padilla samtang ang Bb. PilipinasInternational 2017 nga si Mariel de Leon usab ang leading lady ni Coco. Alang sa mga clueless, anak ni Christopher de Leon ug Sandy Andolong si Mariel.

○○○ Nagyawyaw kuno si Celeste Legaspi kay na-backstage sa MMFF ang ilang proyekto nga adaptation sa dula nga Ang Larawan nga sinulat mismo sa national artist nga si Nick Joaquin.

Way swerte.