‘LACION MIBAWOS; SERIES TABLA, 1-1
Nadasig sa malanog nga abiba sa mabagang dumadapig, ang Consolacion Sarok Weavers yanong milubong sa Minglanilla Archangels, 91-64. aron tablahon ang best-of-three finals series sa 1st Cebu Governor’s Cup Inter-Cities/Municipalities basketball tournament sa gidasokan nga Consolacion National High School gym niadtong Miyerkules sa gabii.
Ipahigayon ang deciding Game 3 karong Dominggo diha sa University of San Carlos gym sa alas 3 sa hapon aron pagdeterminar kon kinsa gyud ang makalangkat sa unang titulo sa maong torneyo nga gihangop ug gisalmotan sa dul-an 40 ka mga ka local government unit (LGU) sa probinsiya sa Sugbo.
Aron paghatag og kahigayonan sa kinabag-an, si Consolacion Mayor Teresita Alegado ug ang municipal council mibutang og dakong screen sa school grounds alang niadtong wala na makasulod sa gym.
Bisan pa man og wala makaduwa si Cyril Sabellana kinsa na-injured og balik atol sa warm-up, ang Consolacion sangkab sa ilang determinasyon sa tinguha nga dili masagmuyo ang ilang nagtipun-og nga mga dumadapig.
Gikan sa pagsugod sa duwa, nakontrolar dayon sa Sarok Weavers ang momentum og gani dali kining nakaposte og 30 puntos nga labaw, 89-59.
“Sa Game 1 gud dili ta agresibo sa atong opensa, na-focus ta sa pasa ug wa gyud ta moataki. Karon, atong gisiguro nga moagresibo ta sa pag-ataki sa ilang depensa batok sa ilang 1-2-2 defense,” matod ni Sarok Weavers headcoach Jun Pepito sa dihang gikahinabi sa Sun.Star Cebu.
Gawas nga naglisod sa ilang depensa, wa usab mag-ayo ang opensa sa Archangels ilabi na nga wa mangigo ang usa sa ilang shooters nga si Mark Justine Nebril nga gani wa kini nahimo sulod sa 20 minutos.
Sukwahi sa Consolacion kinsa nakakuha og balansing kontribyusyon sa ilang bench. Si Emmanuel Villamor maoy nangulo sa Sarok Weavers pinaagi sa iyang 18 puntos.
Subay niini, gipasalig ni Governor Hilario Davide III nga iyang ipadayon ang tournament sunod tuig ug ning higayona diin padak-on ang subsidy nga ilang ihatag ngadto sa matag partisipante. Mga puntos:
Consolacion (91) – Villamor 18, Escalona 14, Yu 11, Montaño 10, Maglasang 8, R. Gonzaga 7, Padayogdog 6, J. Gonzaga 5, Bathan 4, D. Gonzaga 2. Minglanilla (64) – Mangaron 17, MG Nebril 15, Tarrosa 12, Quimson 7, Eredera 5, Pepito 4, Lucero 2, Barquin 2. Quarters: 30-15; 48-33; 70-46; 91-64.