Arsobispo sa Davao bag-ong pangu sa CBCP
Napili na ang bag-ong mga opisyal sa Catholic Bishops Conference of the Philippines (CBCP), duha sa naghupot og taas nga posisyon, nakaalagad sa artsidyosesis sa Sugbo.
Si Arsobispo Romulo Valles, gikan sa artsidyosesis sa Davao, ang lugar nga gigikanan ni Presidente Rodrigo Duterte, maoy sunod nga mangu sa kahugpungan sa mga obispo. Si Valles napili sa plenary assembly sa CBCP sa Pope Pius XII Catholic Center sa Paco, Manila niadtong Sabado.
Ang assembly himuon sa CBCP sa matag duha ka tuig.
Samtang, si Bishop Pablo Virgilio David sa Caloocan, ang napili nga bise presidente. Ang duha nga nakaalagad sa Sugbo nga sila si Palo, Leyte Archbishop John Du ug Padre Marvin Mejia maoy napili pagka treasurer ug secretary general. Si Valles, moasumir pagka presidente karong Disyembre ug mopuli ni Lingayen-Dagupan Archbishop Socrates Villegas, naghupot sa pwesto sud sa upat ka tuig.
Atol sa kampanya sa miaging 2016 election, si Valles ug ubang mga opisyal sa simbahang Katoliko, nakighimamat ni Duterte didto sa siyudad sa Davao.
Human sa panagtagbo, ang presidente nisaad nga minosan na ang iyang pagpamalikas ug modonar og P1,000 sa Caritas sa matag higayon nga kini mamalikas.
Si Valles usab ang nagbunyag sa anak ni Davao City Mayor Sara Duterte ug apo nga lalake ni Pres. Duterte nga si Marko Digong Duterte Carpio niadtong Marso.
Samtang ang mga naglangkob sa Permanent Council Members (Regional Representatives) mao sila si Luzon North: Abp. Marlo M. Peralta; Luzon Central: Bishop Ruperto C. Santos; Luzon South: Bishop Jose R. Rojas; Luzon Southeast: Bishop Victor C. Ocampo; Luzon Southwest: Bishop Reynaldo G. Evangelista Visayas East: Bishop Isabelo C. Abarquez; Visayas West: Abp. Jose F. Advincula; Mindanao North: Abp. Martin S. Jumoad; Mindanao South: Abp Romulo T. dela Cruz.
Si Cebu Archbishop Jose Palma subling napili isip pangu sa Permanent Committee on International Eucharistic Congresses.
Ang ilang termino magsugod sa Disyembre 1, 2017 hangtod sa Nobiyembre 30, 2019.