TOMAS MOSUSI SA TAAS NGA PARKING FEE SA IT

Pakighinabian ni Cebu City Mayor Tomas Osmeña ang tagdumala sa IT Park sa Barangay Apas gumikan sa reklamo sa motorista bahin sa dako nga parking fee. Usa ka lalake nga trabahante sa call center (business process outsourcing) ang nipadangat sa

iyang concern ngadto sa mayor sanglit tag P50 ang iyang mabayran matag parking niya sa IT Park gamit ang iyang motorsiklo.

“I am just an average citizen working in one of the BPO company in IT Park. I am not well versed when it comes sa mga pamaagi ani nga parking services sa IT Park but I think P50 is to much,” padayag sa motorista diin gipakita pa niya ang parking receipt nga gipadala sa FB page sa mayor.

Si Osmeña sa iyang bahin niingon nga iyang kuhaan sa ilang habig ang management sa IT Park sanglit usa kini ka pribadong lugar ug wa siya nipasalig nga mapaubsan niya ang parking fee.

Gitug-an sa mayor nga dugay na siyang nagplano nga maapilan sa rota sa Ceres bus ang IT Park apan ang Land Transportation Franchising ang Regulatory Board di makaisyo og bag-ong prangkisa nga maglakip unta sa IT Park.

Apan gipadayag ni Osmeña nga kon mapatuman na ang Bus Rapid Transit (BRT) sa dakbayan di na unya magdala sa ilang mga motor o sakyanan ang mga trabahante sa BPO.

Gipasabot sa call center agent nga naggamit siya og motor kay makadaginot siya sa plite ug makabana-bana siya sa oras apan moabot na hinuon sa P1,000 ang iyang magasto sa parking matag buwan.

Matod pa sa reklamante nga mapugos sila og parking ug mobayad og tag P50 kay way parking area ang mga BPO building ug kon anaa man ang kadto rang mga dagko og ranggo sa kompaniya ang ilang paparkingon.

“Maayo unta Mayor Tom na matabangan mi ani nimo nga isyu. Maayo unta mapagamyan ang parking fee,” dugang sa call center agent. /