BRT madayon gyud kaha?

Nitumaw karon ang daghang mga pangutana kon madayon ba ang Bus Rapid Transit (BRT) system sa siyudad sa Sugbo. Daghang mga isyu ang naglimin sa maong proyekto. Gikan sa kapin sa 2,000 ka mga punoan sa kahoy nga maapektohan ngadto sa isyu nga makapasamot na hinuon kini sa kahuot sa trapiko.

Pasagdi na lang si Talisay City Mayor Eduardo R. Gullas sa iyang pag-ingon nga di niya ipaapil ang iyang siyudad sa mga rota sa BRT kay wa man maapil sa plano ang Talisay sa BRT. Ang gusto ni Gullas mao man ang light rail transit (LRT) nga mao usab ang gihandom sa mga Sugbuanon nga wa pa gyud makasakay og tren.

Pero ang BRT nga gipasiatab ni Cebu City Mayor Tomas Osmeña nga barato ikomparar sa LRT, nisaka na sab ang presyo. Gikan sa P10.6 bilyunes, nahimo na karon nga P16.9 bilyunes.

Si manlalaban Rafael yap, ang pangulo sa BRT project implementation unit, niingon nga di na mapahunong pa ang BRT project nga gigastohan sa World Bank tungod kay anaa na kini sa implementation stage.

Diha man guy usa ka giingon nga transportation ug engineering expert nga ginganlan og Engr. Rene Santiago nga niingon nga di magsilbi ang BRT sa siyudad sa Sugbo tungod kay hagip-ot man ang mga krasada sa siyudad.

Matod ni Yap, ang mga isyu sa desinyo sa BRT girepaso nag kaduha sa National Economic Development Authority Board. Kon kahagip-ot sa karsada ang hisgotan, matod niya, kini ang hinungdan nga dunay road widening component.

Gawas pa, matod ni Yap, ang pagkanselar sa BRT project mahimong sukwahi sa programa sa administrasyon nga “Build, Build, Build” kay ang mahitabo mao man ang “Cancel, Cancel, Cancel.”

Samtang si Mayor Osmeña, nga nisupak sa LRT, karon niingon na nga way siya mosupak nga ang BRT i- integrate sa LRT. Di sab mahimong ikopmarar nga BRT sa LRT kay wa pa may LRT sa Sugbo

“Let us not be put in a trap. I cannot even compare because there is no LRT. How can we compare? The important element is it does not exist,” matod ni Osmeña.