Sulagma o gituyo?
Dayag sa publiko nga medyo aslom ang relasyon sa liderato sa nag-unang relihiyusong grupo sa nasod, ang Romano Katoliko, tali sa administrasyon ni Presidente Rodrigo Duterto tungod sa managlahing baroganan ug isyu sama sa pagpabalik sa death penalty, exra-judicial killings, human rights, ug uban pa nga nisangko sa pipila ka pagpamalikas sa presidente batok sa simbahan, sama sa pag-ingon og hipokrito.
Kini nahitabo ubos sa liderato ni Lingayen-Dagupan Archbishop Socrates Villegas sa empluwensiyadong Catholic Bishops Conference of the Philippines (CBCP) human ang Arsobispo makadaghan usab niluwat og mga pintok nga pulong batok sa administrasyon apan wala matarog ang naulahi sa dakong empluwensiya sa publiko.
Apan mabali na kaha ang hangin sa relasiyon sa simbahan ug estado? Sama sa gituyo o sulagma lang kaha nga niadtong Sabado, ang CBCP nihimo og elekisyon sa Pope Pius XII Catholic Center sa Paco, Manila ug ang nigawas nga mananug mao si Davao Archdiocese Archbishop Romulo Valles maoy bag-ong napili nga presidente sa grupo.
Si Villegas nahimong pangulo sa CBCP moluwat na sa posisyon human sa upat ka tuig ug si Valles opisyal nga mohulip sa katungdanan karong Disyenbre.
Atol sa 2016 presidential campaign period, si Duterte nakigkita kang Valles ug ubang opisyal sa simbahan sa Davao ug nisaad nga dili magbinastos og istorya sa publiko. Ang Davao- based prelate maoy nipahigayon sa seremonyas sa bunyag sa apo sa presidente nga si Marko Digong Duterte Carpio niadtong Marso ning tuiga.
Sa laktod, suod ug espisyal ang relasyon nila ni Presidente Duterte ug Archbishop Valles nga parehong nakasabot na sa batasan sa matag usa human tautaod nang nag-uban isip mga lider sa Davao. Madala kaha kini sa sitwayon sa bag-ong liderato sa CBCP? Sama sa sulagma o gituyo kaha?