Disiplina sa South Coastal Road

Ang Cebu South Coastal Road nga anaa mahimutang sulod sa South Road Properties nga molagbas sa mga dakbayan sa Sugbo ug Talisay maoy usa ka dakong tabang sa mga motorista sukad sa pag-abli niini niadtong tuig 2005. Bisan og mas taas ang rota niini itandi sa national highway nga moagi sa Tabunok, mas dali ang pag-abot sa usa ka motorista kon moadto siya sa habagatan o amihanan nga dapit sa Sugbo agi niining maong dalan. Ug mapasalamaton ako sa

traffic enforcers sa dakbayan sa Talisay kay nasulbad nila ang kahuot sa trapiko sa habig sa Talisay pinaagi sa pagpagamay sa mga street island nga mipalad usab sa dalan sa gipagamyan nga street islands. Ako usab nga nabantayan nga ila nang gi- synchronize and traffic lights aron dili mabara ang pag-agi sa mga motorista unyag abot na sa sunod nga eskina kay pulos go

signal man ang maagian. Apan dili usab malalis nga tungod niining maong kalamboan, daghan na nga kinabuhi ang nakalas niining maong lugar tungod sa pagpatuyang og padagan sa mga motorista nga dili motuman sa speed limit notice nga gibutang sa daplin sa karsada.

Ang ako lang isugyot nga magpalit ang kagamahanan sa mga siyudad sa Sugbo ug Talisay og speed guns nga maoy mosuta kon pila ang gikusgon sa dagan sa matag morotista ug pamultahon dayon kon makalapas siya sa gitdang gikusgon. Epektibo kini nga gipatuman didto sa dakbayan sa Davao.

Isugyot ko usab nga pamultahon ang mga motorista nga madaotan sa ilang mga sakyanan sa may viaduct birdge tungod sa Ludo sa may Pasil area kay akong nabantayan nga huot kaayo ang dagan sa trapiko kon dunay madaotan nga sakyanan niining maong lugar.

Hinaot nga patalinghugan sa mga hingtungdan nga buhatan kining akong mga sugyot kay alang ra man pod kini sa kaayohan kanatong tanan mga moagi sa South Coastal Road.