Asawa ug trabaho

Dear Papa Joe,

Tawga ko og Roger, 28 anyos, taga Mandaue City. Minyo ko ug ang akong suliran kabahin sa akong trabaho ug sa akong asawa.

Usa ko ka security guard unya ang akong suliran kabahin sa akong ka reliyebo. Kini siya kay magsige lang og ka late ug usahay di na gani ko kapanihapon kay usahay kuwang sa budget. Karon naglibog ko unsaon nako pagsulti ning akong kauban kay dugay kaayo maabot. Ang rason kay traffic. Lapu-Lapu man gud ang among poste ug taga Pardo ni siya. Pero unta, angay siya mosayo og gikan para di siya ma- late unya on time pa gyud mohawa inig ka buntag.

Karon, subay aning sulirana, magsige na sad mi og away sa akong asawa kay di siya motuo sa akong rason nga dugay moabot akong puli mao nga ma- late sab ko og uli sa amo. Feeling niya naa koy gikabuangan nga babaye. Mao ni ang akong patambagan nimo. Unsaon nako ni ang akong kauban ug ang akong asawa. Palihug tambagi ko. ROGER Roger,

Kabahin sa imong kauban, kon gusto nimo, pwede na nimo siya isumbong sa inyong head o sa agency ninyo. I- log nimo o buhatan og discrepancy report para mabadlong siya ug di ka abusaran. Basin tanaw niya nimo masayonsayon lang ka niya ug sa imong asawa. Kon ganahan ka, piktyuri ang log ug inig abot sa imong kauban nga late moabot para naa kay ebidensya.

Kon pwede, magpauban ka niya para ma- witness niya ang pag-abot sa imong kauban o ipa- explain sa imong kauban nga ma- late ka mao ma- late sab ka og uli. Ana lang gud. Daghang salamat sa imong tampo.

(sa inyong tampo ipadal lang sa papajoesuperb@ gmail.com)