Tawo sa salamin
Way gisulting hait nga mga pulong. Apan misiga ang mga mata sa kapungot sa tawo nga iyang nakita. Di man unta inosente kay nahibawo. May kaalam nga gibugtaw ug gitapos. May lalik sa kaambong ang mga linya sa nawong: mata, kilay apil ang kahamis sa panit nga wa pa kataakig mga kunot-kunot.
Kay wa pay tunga sa siglo ang pagpakabuhi bisan puno sa mga tanghaga nga gihubad sa mga suliran. Apan ang pangutana karon mao, diin padulong ang kasinatian? Nganong wa kakita sa gahong nga tinaw man unta ang yuta nga gitumban. Bisan may mingpasad nga makasambol sa tinan-awan sama sa bato, sagbot, layang dahon ug nasaag nga kagingking naaninaw man unta kining tanan.
Pagpasagad. Pamahala. Pagtuo nga way kapakyasan luyo sa lihok maoy hinungdan ning tanan. Miagahad ka pamasin nga manglakaw ang nagkupot nga kagilok. Daw nipilit ug di makuha. Nakapasamot sa kasakit sa bukog nga nagtaop sa imong tutonlan. Bukog nga di malagnot?
“Iway mo kay moagi ang hari. Dali. Madasmagan mo ug malukapa!” Nahinumdom ko sa akong kabagsik. Sa akong kahawaod nga gibakbakan sa bahandi nga naangkon tungod sa paningkamot nga matuman ang pangandoy sa kaharuhay nga nakapatubo sa tango sa garbo sa kaugalingon.
Ang tanan mihangad kanimo. May tuyo o wa ikaw ilang gitahod. Gidamgo sa mga Eva nga buot sad mopahimus sa imong suwerte. Apan gahi ang imong kasingkasing atuban- gan kanila. Apan may sinugdanan ang sipyat o sayop sa paghukom. May agianan ang demalas nga modailos sa kinauyokan.
May mihunghong unta sa imong dunggan sa paghinaysa di pagsakwat dayong unta sa maong kahigayunan nga miabot. Apan nakaipsot kanimo ang maong pasidaan. Kay unsaon nabihag ka sa usa ka katahuman nga imong gipa ngita. Bisan sa kinasuokan sa imong daman siya ang mibulto. Siya gayud ang hinungdan sa imong kahigwaos ug kabalaka. Busa gigukod mo siya hangtod nahagbong ka sa gahong sa mini nga himaya. Kay kagawon, kagawon nga Miss Universe!
Kay mag-unsa man ang bahandi kon gihigtan na ang dagan sa pagpakabuhi. Di na ka kabuhi. Bisan kon gipabayad mo siya sa pag-ilad kanimo. Way silbi ang pagpalit sa hustisya. Ikaw mosangko na man sa katapusan nga nagbugalbugal kanimo bisan ning imong umaabot nga pagpahawa sa kalibutan nga unta wa man kini mohingilin kanimo.
Miagahad ka na sad. Nag- umido ang imong buot. Gitutokan mo pag-ayo ang larawan. Dako pa kaayong buhi nga nanghimaraot kanimo. Sa imong kasaypanan nga bunga sa pagpasagad sa pamahala sa katagbawan sa luog nga kahinam.
“Nganong nasayop ka. Bay Roel?” Nagpanglingo ang higala mong doktor. (KATAPUSAN)