MINGLA 1ST GUV'S CUP CHAMPION 70 ka boxers banned sa GAB
Mikulit ang Minglanilla Archangels og makasaysayon nga kalampusan human kini maoy unang lungsod nga nakalangkat sa 1st Cebu Governor’s Cup Inter-town/municipalities basketball tournament nga gipahigayon sa gipunsisukan nga University of San Carlos gym, dalan Sanciangko, dakbayan sa Sugbo.
Ang Minglanilla, ang katapusang lungsod nga mikompirmar sa ilang partisipasyon, kagahapon mipakaging sa Consolacion Sarok Weavers, 75-69, sa deciding Game 3 sa finals sa maong tournament nga gisalmotan sa 38 ka mga dakbayan ug lungsod sa probinsiya sa Sugbo.
Tam-is nga kadaugan maoy nasinati sa mga batos ni coach Edito Salacut ug team manager Mickey Oberes sanglit niagi pa kini sa tumang kalisod una pa nila makab-ot ang himaya.
Nabiyaan ang Archangels og 14 puntos sa first half ug nagpabilin nga double-figure ang labaw sa Sarok Weavers sa third quarter. Ang outside shooting sa Consolacion maoy naghatag og labad sa Minglanilla hangtod na sa sayong bahin sa fourth quarter.
Apan sa kalit lang nausab ang timplada sa duwa sa dihang si Salacut mipahamtang og trapping defense nga nakapapugos sa Sarok Weavers sa pagmugna og sunodsunod nga turnovers.
“Ako lang giingnan ang mga bata nga relax lang ta sa depensa ug ayaw gyud og give up mintras duna pay oras. Wa gyud sila molubad grabi ang ilang trabaho ug salamat ta sa Ginuo nga gihatag ni niya nato,” matod ni Salacut sa dihang gikahinabi sa Superbalita Cebu.
Nagsugod pagpanginit ang opensa sa Archangels sa dihang naka 3- point play si Kevin Quimson ug ang trapping defense hinayhinay nga miepekto nga giabayan usab sa pagpangigo og tres ni Mark Justine Nebril.
Ang igsuon nga si Marc Glenn Nebril ug ang skipper nga si Jiesel Tarrosa maoy mitawas sa nag-aso-aso nga rally sa Archangel kinsa gawas sa local government unit hugot usab nga gisuporta sa Oberes family nga gipangulohan ni businessman/ sportsman Jerry Oberes.
Lakip sa mitambong sa maong duwa mao sila si Governor Junjun Davide, Vice Governor Agnes Magpale, Congressman Samsam Gullas sa first district diin nasakop ang Minglanilla, Board Member Glenn Bercede, Minglanilla Mayor Lani Peña, Vice Mayor Jojo Selma.
“Katong atong trapping maoy nakapa- neutralized sa ilang tres ug maayo sab kaayo nga nakasuporta ang akong second stringers,” dugang ni Salacot.
“Our trapping neutralized their three point shot and I thank my second stringers for stepping up when they were needed most.”
Si Tarrosa miyagyag og 20 puntos, 12 niini sa fourth quarter samtang si Glenn Nebril nitali og 12 ug 11 usab ang kang Jan Mangaron. Si Yu nangulo sa Consolacion nga may 13 puntos, Emmanuel Villamor adunay 12.