Malinawon ang ASEAN Summit
Mihulagway ang Police Regional Office (PRO) 7 nga malinawon sa kinatibuk-an ang kapin sa usa ka semana nga kalihukan sa Asean Summit nga gilusad sa siyudad sa Sugbo.
Atol sa gihimong assessment sa PRO-7 sa Multi-Agency Coordinating Center nasuta nga way bisan usa ka insidente nga natala ang kapulisan nga dunay kalabutan sa Asean summit.
Tungod niini gidayeg ug gipasalamatan ni PRO 7 director Noli Taliño ang naglangkob sa security nga usa sa nakatampo sa malampuson nga dakong kalihukan sa Sugbo.
Hingpit na usab nga nakabiya ang kapin sa 200 ka mga delegado ug luwas kining nahatod sa airport niadtong Dominggo.
Nakadawat og impormasyon si Taliño nga posibling dunay laing Asean leaders meeting nga himuon na usab dinhi sa Metro Cebu sa mosunod nga mga buwan.
Wa mabalaka niini ang PRO7 director sanglit napamatudna nga ang kapulisan sa Central Visayas maayo ang pagkadala sa seguridad ug susama sa ilang gihimo sa nangaging Asean meeting mao usab kini ang ilang buhaton.
“May information tayo na may Asean meeting na naman na dito rin sa Cebu gaganapin, nakahanda pa rin tayo na magbigay ng security kagaya ng ginawa natin sa una at pangalawang Asean Leaders meeting,” matod ni Taliño.
Nahimong kritikal ang ilang paghatag sa seguridad sa dihang namauli na ang mga delegado paingon sa ilang tagsa-tagsa ka mga nasud.
Gihatagan sa hugot nga seguridad sa PRO-7 ang Mactan Cebu International Airport lakip na ang giagian niini gikan sa ilang gisak-ang hotel ug wa sila mobiya hangtod nga wa makabiya sa Sugbo ang mga bisita. /