Usbon ang pagtan-aw

Nag-viral sa social media ang paghikog sa usa ka batan-ong babaye nga nigamit sa Facebook live sa pag-broadcast sa iyang gihimo. Laing lalake nga nasakitan sa iyang lovelife nanamilit usab sa iyang hinigugma ug pamilya pinaagi sa Facebook. Ang Cebu maoy usa sa mga dapit sa Pilipinas nga dunay taas nga mga kaso sa paghikog.

Ang suicide taas usab sa industriyalisadong mga nasod kun mga dapit nga adunahan.

Sa mga pagtuon, ang depression kun tumang kaguol maoy usa sa mga hinungdan sa paghikog. Sagad sa hinungdan sa kaguol mao ang gugma ug sakit.

Usahay makapangutana ang kahigalaan ug pamilya kon nganong nabuhat kini sa nahingtungdan nga wa man kini magpakita og timailhan nga kini naguol o dunay problema. Mas nakugang ang pamilya nga sanapan usab sa tumang kaguol.

Sa taas nga kaso sa suicide, kinahanglan nga moila na ang kagamhanan niini nga suliran. Panahon na nga dunay balaudnon nga gitumong aron mawagtang o matibhangan kining mao nga mga kaso.

Magbutang og mga pasilidad diin dunay mga batid nga kadangpan ning mga tawhana. Mga tawo nga kahibawo motagad sa mga tawo nga naa sa tumang kaguol.

Himuon nga rekisito sa mga kompaniya nga maghimog mga programa sulod sa trabahoan nga magkombate sa depression.

Ang mental health program kinahanglan usab itudlo sa mga tunghaan kay kini usa sa mga epektibong paagi sa pag-andam sa usa ka tawo kon pananglitan siya maapektuhan sa depression.

Usbon usab ang mentalidad sa katawhan aron isipon ang depression nga usa ka sakit nga kinahanglan tambalan ug tabangan ang tawo nga naigo niini.

Laing usbon mao ang pagtan-aw nga di tanang tawo nga nakigkita og psychiatrist buang.