Shabu 'giuban og baligya' sa ukay-ukay

Tinderag ukay-ukay nasikop human nakuhaag binultong shabu niadtong Biyernes sa alas 6:30 sa gabii atol sa buy bust sa Brgy. Tangke, dakbayan sa Talisay.

Si Jean Mary Alferez, 18, taga Suba, dakbayan sa Sugbo, gipusasan nila ni Supt. Joie Yape, Jr., hepe sa Provincial Intelligence Branch (PIB) sa Cebu Provincial Police Office (CPPO), kinsa maoy nangulo sa joint operations uban sa mga sakop sa Provincial Drug Enforcement Units (PDEU), Provincial Public Safety Company (PPSC), Special Weapons and Tactics (SWAT) ug Talisay Police Station.

Samtang nakaipsot ang iyang uyab nga si Jun Kim Cabanes, 35, minyo, kinsa maoy gikatransaksyon sa kapulisan.

Si Yape, nga nahinabi sa Superbalita Cebu nagkanayon nga si Cabanes, uban ni Alferez, duha ka buwan nilang gi-monitor.

Ang ilang supply sa shabu gikan sa dakbayan sa Sugbo, diin ibaligya nila sa Talisay ug mga silingan ang lugar.

Sila si Cabanes ug Alferez, pulos nalakip sa ilang listahan sa mga high value target (TVT) sa Provincial level.

Atol sa transaction, gipalitan og usa ka pakiteng shabu si Cabanes, apan nikisi-kisi dihang dakpon na unta ug nakadagan apan nahanaw.

Hinuon nasikop si Alferez ug nakuhaan og 20 ka gagmayng putos sa shabu, apil niini ang usa ka pakiteng shabu nga buy bust, duha ka medium nga putos, tanan motimbang og 15 gramos nga mobalor sa P177,000.

Lakip sa narekuber ang digital weighing scale ug mga drug paraphernalia.

Si Yape niingon nga gisubay na nila karon ang ubang koneksyon nila ni Cabanes ug Alferez.

Si Alferez nipadayag nga usa lang siya ka tindera sa ukayukay sa iyang iyaan ug wa sila namaligyag drugas.

Si Cabanes mao ang namaligya ug gisigihan niyag badlong, wa mopatuo.