Pagtaktak sa barangay treasurer gikondenar

Gikondinar sa upat ka mga barangay kawagad sa Labogon,dakbayan sa Mandaue ang “sayop” nga pagtaktak ni Kapitan Renato Suson sa tresurera sa barangay nga si Sarah Arrofo.

Sumala pa sa upat ka mga kagawad nga sila si Amado Manatad, Corazon Tumulak, Baby Gutierez, ug Marvin Soco nga way igong kapasikaran si Kapitan Suson pagtaktak ni Arrofo.

Sa termination order ni Kapitan Suson ngadto ni Arrofo niadtong Hulyo 3, kini nagtangag og 10 ka mga rason nganong gi-terminate niya ang maong tresurera.

Una niini ang paglaslas sa tabang pinansyal sa mga PWD, pagtago sa duha ka mga kopya sa resolusyon, absent without official leave (AWOL) niadtong Enero alang sa pagbisita sa mga paryente sa Davao ug tibuok buwan sa Mayo sa paglarga sa abroad ug pakyas sa pagtagad sa duha ka mga special session niadtong Abril.

Sa iyang order, si Suson niingon ni Arrofo nga kini wa na nanimuyo sa maong barangay, tapulan, sigeg absent, bakakon ug uban pa.

“With the foregoing and due to your grave abuse and serious misconduct, the undersigned has decided that you are hereby terminated for a cause effective immediately,” ni Suson sa iyang order.

Apan ang upat ka mga kagawad, sa ilang suwat ni Suson, niingon nga way basehan ug kapasikaran ang kapitan sa iyang pagtaktak ni Arrofo.

“We condemned on the strongest terms, your act of shaming, harassing, intimidating, oppressing, locking her up inside the barangay hall and preventing her from going out of her office last July 3 using your known alcoholics and fanatic barangay tanod,” sumala pa sa mga kagawad.

Dugang sa mga kagawad nga way basehan ang pagtaktak ni Arrofo sanglit nakalapas kini sa section 389 (5) sa RA 7160 nga ang pagtudlo o pag-ilis og kawani sa posisyon niini depende sa pagtando sa mayoriya sa konseho sa barangay.

Wa usay kapasikaran ang pagpalagpot ni Arrofo sukwahi sa alegasyon sa kapitan, sumala sa upat.

Dugang nila nga ang kaso nga gipasaka ni Suson batok ni Arrofo sa Office of the Ombudsman-Visayas padayon pang giimbestigahan sa maong buhatan ug pabiling inosente si Arrofo hangtod kini mapamatud-an nga sad-an.

Ang pagbabag sa mga kagawad sa terminasyon gipaabot nga maabot sa Sangguniang Panlungsod sa dakbayan. /