MARTIAL LAW GI-EXTEND
GIAPROBAHAN SA KONGRESO, SENADO
Ang Kongreso nilugway sa
martial law sa Mindanao og laing unom ka buwan, hangtod sa Disyembre 31.
Pagtugot kini sa mga pwersa sa kagamhanan sa pagpadayon sa ilang mga opensiba batok sa Maute terror group sa Marawi.
Atol sa special joint session sa Senado ug Ubos Balay Balauranan, mokabat sa 261 ka mga magbabalaud ang nipabor sa paglugway sa martial law ug pagsuspenso sa writ of
habeas corpus sa habagatan. Si Senate President Aquilino Pimentel III niingon nga 16 ka mga senador ang uyon samtang upat lang ang supak.
Mga senador nga ning-uyon mao sila si Juan Edgardo “Sonny” Angara, Joseph Victor “JV” Ejercito, Francis Escudero, Sherwin Gatchalian, Richard Gordon, Gringo Honasan, Panfilo Lacson, Loren Legarda, Manny Pacquiao, Aquilino Pimentel III, Grace Poe, Ralph Recto, Vicente Sotto III, Joel Villanueva, Cynthia Villar, ug Juan Miguel “Migz” Zubiri.
Ningsupak mao sila si Senate Minority Leader Franklin Drilon, ug mga senador nga sila si Bam Aquino, Risa Hontiveros ug Francis Pangilinan.
Sa House of Representatives, si House Speaker Pantaleon Alvarez niingon nga ang proposal ni Presidente Rodrigo Duterte giuyonan sa 245 ka mga magbabalaud, samtang 14 ang supak. Way ning- abstain. Ang martial law proclamation, nga kutob ra unta kagahapon, Hulyo 22, gideklarar niadtong Mayo 23.
Kini human maengkwentro sa mga tropa sa kagamhanan sila si Abu Sayyaf leader Isnilon Hapilon ug Maute group.
Niabot na og 60 ka adlaw ang krisis sa Marawi City kagahapon.
Si Duterte nitumbok sa Section 18, Article 7 sa 1987 Constitution pagdeklarar og martial law.
Ang proposal sa paglugway sa proclamation nagagikan kang Armed Forces of the Philippines Chief-of-Staff General Eduardo Año, tigpatuman sa
martial law sa Mindanao. Sa iyang pagtubag sa session kagahapon, si Año niingon nga iyang gihimo ang rekomendasyon aron pagseguro nga way masubli nga Marawi sa umaabot.
“All of us in the military organization, our only desire is to finish this crisis the soonest time possible,” siya niingon. / SunStar Philippines