ALAYON WALA MASIAK: GULLAS

Giklaro ni Mayor Eduardo Gullas sa dakbayan sa Talisay nga wala masiak ang ilang partidong Alayon bisan og adunay wala pagkasinabot sa konseho human nga si Konsehal Dory Emit gihukasan sa iyang komitiba, ang urban poor. Atol sa miaging regular session

sa konseho, nahiubos si Emit sa iyang mga kaubang konsehal nga gani iya kining gihulagway nga nasina lang sa iyang lihok pagtabang sa mga

urban poor, hinungdan nga gikuhaan siya'g komitiba.

Si Gullas nibutyag nga wala mausab ang iyang baruganan nga dili manghilabot sa kalihukan sa konseho aron dili usab siya hilabtan sa konseho.

Hinuon, malaumon si Gullas nga iyang girespetaran ang konseho tungod kay siya nagtuo nga ila ra kining masulbad isip usa ka pamilya.

Apan wala usab magtuo si Gullas nga tungod lang sa maong isyu masiak na ang iyang grupo sa Alayon.

Gani kuwang man siya sa pagtuo nga mobiya si Emit sa ilang Alayon Party.

Samtang wala usab moduol kaniya si Emit aron mopahibawo kaniya sa nahitabo.

Si Emit niingon nga wala siya moduol sa mayor human nitamod siya sa pamahayag niini nga dili manghilabot sa kalihukan sa konseho. “O pero posibleng gi- briefing or gipahibawo nana siya sa atong Bise Mayor Bucao,” matod ni Emit.

Mapasalamat si Emit ni Mayor Gullas sa maong pamahayag sanglit matod niya nga hangtod karon nagtuo pa siya sa baruganan sa partido ug wa siyay planong mobiya.

Sa konseho, bugtong si Konsehal Val Ylanan na lang ang midaug nga dili Alayon, apan wala kini mopakita'g pagsupak sa mga plano ug lakang ni Gullas. /