Mga magtutudlo walay igong kapasidad alang sa pag-ila bahin sa IED: Dr. Angtud
Nunot sa pekeng pagpakatap sa hulga nga bomba sayo ning semanaha, giangkon sa Cebu Schools Division nga way kapasidad ang ilang mga magtutudlo pag-ila sa improvised explosive devices (IEDs) o sa bisan unsang matang sa bomba.
Dili gusto si Cebu Province Schools Division Superintendent, Dr. Rhea Mar Angtud, nga maapektohan sab sa
bomb scare ang mga tinun-an sa probinsiya sama sa nahitabo sa dakbayan sa Sugbo niadtong Martes.
Nunot niini, gihangop niya ang tinguha sa Provincial Disaster Risk Reduction and Management Office nga lakip ang mga magtutudlo ug uban pang personnel sa DepEd ang ipaubos sa training labot sa
bomb threat preparedness ug management.
Matod ni Dr. Angtud, bisan ang mga principal walay kahibalo sa pag-ila og IED o bisan unsang matang sa bomba.
Nagtuo siya nga dako unya og matabang kon mapaubos sila sa training aron mamahimong luwas ang tunghaan ug ang mga tinun-an gikan sa hulga sa seguridad. Human ang nahitabo nga
bomb threat sa Cebu City niadtong Martes, nipagawas dayon og memorandum si Angtud alang sa tanang principal ug magtutudlo sa probinsiya aron sila magmabinantayon. Lakip sa unod sa maong
memo ang pag-awhag sa parent
brigade sa mga pampublikong tunghaan nga motabang pagbantay sa seguridad ug itaho dayon sa mga tagdumala sa eskwelahan o kaha sa mga awtoridad ang mga kadudahang tawo nga posibleng maghimo og kagubot. Kon makadawat og bomb
threat, pahimangno ni Angtud sa mga magtutudlo nga dili mag- panic ug siguruon ang kaluwas sa pagpabakwhit sa tanan nila nga mga tinun-an.