Hinanggaw nga plano

Gibutyag sa ‘kanhi laos nga pulitiko’ nga kon mo-operate na ang Bus Rapid Transit (BRT) iya nang did-an ang private nga mga sakyanan nga makasulod sa kinapusuran sa dakbayan. Kon maghisgot ta og kinapusuran sa dakbayan, mao kana ang downtown area sama sa Osmena blvd, Colon st., ug ubang mga dagkong kalsada sa sentro sa dakbayan. Basin apil pa siguro ang Fuente Osmeña.

Ang iyang rason aron dili na maghuot ang dagan sa trapiko kon ang mga public utility vehicles sama sa mga jeepneys ug mga taxi units lang ang magdagan ning maong mga kalsada. Tanawa rag unsa ka yabag kining maong tawo. Hinanggaw ning maong plano.

Unsa may rason sa mga tawo o tawo nga mopalit og sakyanan kon maka-afford siya? Kay aron hamugaway alang kaniya ang pagbiyahi gamit ang iyang kaugalingong sakyanan. Nahibawo naman kita kon unsa ka langan ug kahasol kon mosakay kita sa public utility vehicles ug mahal usab ang taxi karon.

Unya karon iyang did-an ang private car owners nga mogamit o mo-agi sa mga kalsada sa kinapusuran sa dakabayan? Wala siya kuyapi? Basin nagtuo na lang gyud siya nga siyay tag-iya sa Sugbo kay siya ra ang magbuot? Aduna ba siyay survey o study nga ang mga private cars maoy naka-ingon nga mi-grabe ang kahuot sa dagan sa trapiko sa downtown area?

Iya kining gituyo aron ang mga tawo bisan adunay kaugalingong sakyanan mapugos pagsakay sa BRT aron kini mokita? Unsa may sala intawon sa mga private car owners nga iya mang iningnon ani? Unya silang mga opisyal sa City Hall nga anaa kana sa downtown area, andam kaha nga motuman usab niini?

Siya ug ang ubang mga opisyal diha sa City Hall ug nga negosyante diha sa downtown area, mosakay kaha ug mosagol kaha sa rdinaryong mga tawo nga mosakay sa mga PUV ug kanang iyang BRT? Tan-aw nako aning tawhana morag nayabag na kay bisan ang mga hinanggaw nga plano misangpot man sa iyang utok.