Di sa armas lang

Human sa pipila ka mga tuig nga kahilom, mipakita sa ilang kusog ang New People’s Army (NPA) pinaagi sa pag-ambush sa mga pulis sa Guihulngan City, Negros Oriental. Unom ka mga pulis ug usa ka sibilyan ang nangamatay. Mao kini ang labing maduguon nga engkwentro ning nakalabay nga katuigan. Taudtaud nang wa nay engkwentro sa isla sa Negros nga maoy labing grabe og suliran sa insurhensya sa 1970s ngadto sa sayong bahin sa 1990s.

Sa dekada 2000, anam nga nahilom ang mga rebeldeng komunista samtang niarang-arang ang kahimtang sa mao nga lalawigan. Duna nay maayong mga imprastraktura ug nilambo ang mga patigayon.

Ning pipila ka mga buwan ang nakalabay, duna nay nasigpatan nga armadong mga tawo nga nanunggo sa Negros, hayan mga NPA gikan sa Mindanao.

Nganong ni-survive ang mga rebelde ning panahon karon? Ang labing maayong abuno sa rebelyon mao ang kakabos ug inhustisya. Kon naa kini sa usa ka lugar, mabuhi ang rebelyon. Kuhaa kini nga kondisyon, mamatay ra kini og iyaha.

Tinuod, ning mao nga han-ay, dunay mga komunista nga tinud-anay. Ila kining idolohiya. Apan sa tinud-anay usab, pipila lang kini sila. Kadaghanan sa mga NPA naengganyo sa mga saad.

Kinsa man nga mag-uuma ang di ganahan kon ikaw suweldohan og binuwan sa imong pag-alsa og armas kay sa magbugwal sa uma nga way klaro ang kita taliwa sa tumang kahago.

Sa pagsulbad sa pagkabuhi sa mga NPA sa Negros, di lang kay armas ang gikinahanglan, kon di sulbaron ang kakabos ug inhustisya nga nasinati sa labing kabus sa kabukiran.

Gikinahanglan ang panginlabot sa suliran sa tanang sektor aron mahuyang ug mamatay ra og iyaha ang insurhensya.

Sama sa usa ka isda nga gikuhaan og tubig, nagtinga ug anam nga namatay.