Saksaksinagol
Binasi sa Kinaadman 12:13,16-19; Salmo 86; Taga-Roma 8:26-27; ug Mateo 13:24-30
Naay mga babaye nga mobati og kaibog sa laing babaye. Aduna say mga laki nga maibog sa laki. Kaniadto madungog nimo nga kon bayoton, kulatahon lang kuno aron mogawas ang pagkalalaki. Kon lakin-on sad kuno, pugson og pag-uyab aron mogawas ang pagkababaye. Sayop kaayo kining mga panghunahuna. Daghan niining mga naglibog sa ilang pagkasila nag-agi og mga kasinatian nga maoy nakapalibog nila. Tabangonon sila niini imbis nga pasakitan.
Lahi ang pamaagi sa kasamtangang panahon. Bag-o pa lamang nahitabo nga usa ka bantugang mang-aawit nga babaye nagpatangtang sa iyang totoy pinaagi sa operasyon ug nagpa-injection og tambal nga makapahatag niyag bungot. Nadaot ang iyang maanindot nga tingog nga hinatag sa Dios. Gipaandayonan niya ang iyang gibati. Sayop pod kini.
Ang kinabuhi saksaksinagol. Mao kini ang mensahe sa ebanghelyo ni Mateo. May tagiya og uma nga nangsabwag og binhi sa trigo sa umahan. Samtang natulog siya, mingsabwag usab og binhi sa balili ang iyang kontra. Nanglawgaw ni.
Susama kaayo ang hulagway sa trigo ug sa balili. Sa dihang namatikdan na kini sa mga trabahante sa uma, nagkabalikos na ang mga gamot niini ug kon ibton ang usa ang lain maibot usab. Gipaandayonan na lang sa tag-iya ang maong kahimtang hangtod sa ting-ani.
May risgo ang maong pamaagi sa tag-iya. Mahimo man god nga sa panahon sa ting-ani mas molambo ang balili kay sa trigo ug ang tanan isugnod na lang. Unsaon man pagpalambo sa trigo ug pagpakunhod sa balili?
Ang trigo mao ang gasa sa Dios. Matag usa kanato gasa sa Dios – lakip na ang atong pagkababaye ug atong pagkalaki nga nahipatik sa atong mga “genes”. Bililhon kita ug nakadawat og uban pang mga gasa sa lawas, kalag, ug espiritu. Ang atong pagtuong Kristohanon usa ka dako kaayong gasa.
Apan naa say manglawgaw nato. Kini mga kasinatian nga nakasamad kanato ug tungod niini mosimang na ang atong panghunahuna. Lakip pod ang mga popular nga panghunahuna nga sukwahi sa pagtulon-an sa Dios.
Kon paandayonan nato kining mga sukwahing panghunahuna kita ra say madaot. Apan tungod kay hingpit ang gahom sa Dios, sumala pa sa libro sa Kinaadman, luag pod ang iyang paghusga. Sumala sa maong libro, kining iyang pagkaluag nagawhag kanato sa paghinulsol.
Daghang makalibog kaayo sa atong kasamtangang panahon. Ang kalibog gipasiugdahan ug giduso sa daghang mga iladong tawo, sama sa mga artista sa Hollywood ug mga politiko. Kinahanglan magpatabang ta sa Espiritu Santo sa atong pag-ampo aron malamdagan ta, sumala pa sa sulat ngadto sa mga taga-Roma.
Ang pagpasakit sa mga naglibog sa ilang pagkalalaki ug pagkababaye, dili maayo. Apan ang pagpaandayon pod sa gibati, di pod maayo. Palambuon nato ang atong pagkanilalang sa Dios pinaagi sa pag-ampo ug pagsunod sa iyang plano sa matag usa kanato.