The time you say I love you
Gikan sa akong gitindogan sa second floor, malantaw ko ang parking area sa school
campus. Vacant period nako ug wa ko ganahing mokanaog. Nia sa maong floor ang classroom sa sunod kong subject.
Aside from that, hapit na sab ang oras sa akong klase.
Malipayon si Cliff nga nakig-estorya sa iyang mga barkada nga parehas sab niya, anak og mga datong ginikanan. Upat silang managbarkada, ug parehas ang kurso nga gikuha. Dinhi ko ra gikaila si Cliff sa university nga among gitunghaan.
Nakapanglingo ko. Sa tanaw ko kang Cliff, mas gipalabi niya ang iyang mga barkada kay sa iyang pag-eskuwela. Kanunay lang mag- cutting
classes uban sa iyang mga barkada.
“Sus, sige man lang kag tanaw niya, uy, Rona. Sugta na si Cliff, uy.”
Igo ko lang gipasiplatan si Maggie nga miduol nako. Si Maggie ang nagpaila-ila namo ni Cliff sa usag usa. Silingan ni Maggie si Cliff sa dakong subdivision sa Banawa. Ug classmate ko si Maggie ug nahimo kong bestfriend.
“Wa ko mangandoy nga makig- boyriend sa tawo nga way direksyon sa kinabuhi, uy, Mags.”
Mipakibo ko sa akong mga abaga.
“Bitaw sab nang tawhana, uy. Sige lag duwa-duwa sa iyang kinabuhi. Pa- easy-easy lang. Salig lang kay bugtong anak.”
“Lisod nga mamasin tang mga girls sa parehas niyag kinaiya, Mags. Nakapasar uroy na siya, no, nga wa may interes sa iyang pag-eskuwela.”
“Aw, mao nay lisod tubagon, Ron.”
Mipahiyom lang si Maggie. Nakahibawo mi nga ang mga ginikanan ni Cliff suod kaayo sa pamilya sa tag-iya sa university nga among gieskuwelahan. Nakapanglingo na lang ko. Unya nanakay sila si Cliff ug ang iyang mga barkada sa
tagsa-tagsa nila ka motorsiklo. Dali ra nila kining gipaandar.
“Tan-awa, Mags, buntag pa gani, manggawas na sila sa
campus.” Nakapangawot ko sa akong ulo.
“Aw, unsa pa man diay? Anad na sila anang cutting classes.”
Wa na lang ko magtingog. Igo ko na lang gisundan sa pagtan-aw sila si Cliff ug ang iyang mga barkada nga nanggawas sa gate sakay sa ilang mga motorsiklo.
Unya nagdungan mi si Maggie sa pagbiya sa among nahimutangan kay nalantawan namo ang among propesor nga nagpaingon na sa among classroom.