Exercise: nganong makaayo

Nangutana ang usa nako ka anak kon nganong ang exercise makapalig-on sa immune system mao nga gahi kitang masakit. Akong giingnan ang akong anak nga wa pay tukma nga tubag tungod kay mga teyoriya ra kini.

Pipila sa mga teyoriya mao nga pinaagi sa pagpagawas sa singot, mabanlas usab ang mga bacteria ug virus sa atong lawas. Mopausab kini sa kahimtang sa atoang white blood cells nga maoy gigamit sa atong lawas sa pagkombate sa mga virus.

Ang mubo nga pagsaka sa temperatura sa atong lawas mopugong sa pagsanay sa kagaw sud sa atong lawas. Kana bitawng hilantan ka, ang kainit gihimo sa lawas aron pagpatay sa kagaw nga nisung sa imong ginhawaan.

Laing teyoriya nga akong nasugatan mao nga kon kutasan ka, ang imong utok magtuo nga dunay invasion sa lawas hinungdan nga ang immune system palihukon

Gawas sa pagpalig-on sa immune system, maayo usab kini sa kasingkasing tungod kay ang fats nga naa sa imong kalawasan, gamiton sa lawas nga enerhiya. Iya ning sunogon. Busa, inay nga tagoan sa lawas ang fats diha sa kaugatan, masunog kini. Wa nay mosampong sa kaugatan, labina sa imong kasingkasing.

Kalipay

Gawas nga mopasaka sa imong pagsalig o pagtan-aw sa kaugalingon, makahatag usab kanimo og kalipay ang ehersisyo. Kay ang utok mopagawas og happy hormones ug mopahinay sa stress hormones. Busa ayaw kahibung kon daghan sa mga tawo nga mag-ehersisyo malipayon. Taas usab og kinabuhi, labina niadtong way bisyo sama sa inom ug sigarilyo.

Ang ehersisyo numero uno nga taming sa imong stressful nga trabaho.

Kining tanan akong nasinati labina niadtong kanunay ko nga nag-exercise pinaagi sa biseklita samtang nakigbisog sa pagkawala sa among ikaduhang anak nga babaye. Di lalim ang mao nga kasinatian. Kay bisan gani ang akong asawa nagbalikbalik sa ospital tungod sa psychological nga epekto sa kamatayon sa among anak. Nailhan na siya sa emergency room sa usa ka ospital.

Hangtod nga siya nay nisulti nako nga motuon siya og biseklita. Tuod, nawagtang ang tanan niyang gipamati.

Epekto

Busa, kon ikaw nagtrabaho, ayaw usiki ang panahon sa inom, sigarilyo, laag ug uban pa nga maghikaw sa imong kaugalingon nga makaehersisyo. Pangitag panahon nga makapasingot. Exercise kay way dautan kini nga epekto sa imong lawas. Makadaut lang ang exercise kon palab-anan.