Fighter Wine moapil sa 2017 Emil's Cup
Mga duwa karong Sabado: (Minglanilla Sports Complex) 6:30 pm. - Samsam Gullas
vs. Aspa Scaffoldings 7:30 pm. - SG-ARQ Builders vs. Riss Lending/Eagles Express 8:30 pm. - San Remegio vs.
Fighter Wine
Gawas sa paghibalik sa
inaugural champion San Remegio Properties, ingon man sa bag-ong pagsulod sa Riss Lending/Eagles Express, ang Fighter Wine
team miitsa na usab sa ilang partisipasyon sa 10th Emil’s Fresh Chicken Invitational
basketball nga mosugod karong Sabado sa Minglanilla Sports Complex sa lungsod sa Minglanilla.
Ang partisipasyon sa Fighter Wine nakompirmar sa mga nagpasiugda human mihangyo ang Abrenica Engineering nga mopalabay sa karong tuiga aron pagtutok sa ilang proyekto sa Samar Leyte. Si Roger Yap, ang kanhi PBA
mainstay, gipaabot nga maoy mangulo sa Fighter Wine sa torneyo nga ning higayona salmotan sa unom ka mga team nga naglakip sa defending champion Samsam Gullas team, SG-ARQ Builders ug ingon man sa Aspa Scaffoldings.
Atol sa meeting kagahapon sa Grand Convention Restaurant, nakab-ot usab ang kasabutan nga 15 lang ka players ang makaduwa sa matag team bisan og gitugotan kini nga makalista ngadto sa 20 ka players. Gikauyonan usab nga adunay P10,000 nga registration fee. Hinuon kini maoy magsilbing per win bonus sa matag duwa, gawas sa kinatibuk-ang premyo sa tournament nga gipasiugdahan ni businessman/sportsman Jerry Oberes ug inabagan usab sa barangay ug sa municipal officials sa Minglanilla. Gawas sa championship trophy, adunay cash prize nga P110,000 ang malabni sa makampyon samtang ang runner up makabulsa og P50,000. P30,000 usab ang mabulsa sa third placer.