KYRIE GUSTO NGA MOBIYA
Nagtinguhang mobiya si Kyrie Irving sa Cleveland Cavaliers sugod sa sunod season sa National Basketball Association (NBA).
Matod sa usa ka tinubdan nga ang four-time All-Star mihangyo mismo sa tag-iya sa Cavaliers nga si Dan Gilbert kabahin sa iyang plano sa miagi pang semana. Una kining gitaho sa ESPN.
Sulod na sa unom ka mga tuig nga nagduwa si Irving sa Cavaliers, nga nagpili kaniyang No.1 overall pick niadtong 2011.
Gihasol si Irving og pagkaangol una niya napakita ang iyang saktong abilidad nga nagpahimo kaniyang usa sa labing dekalidad nga pointguards sa liga.
Ang panagtambayayong nila ni four-time MVP LeBron James mao ang naghatag sa Cavaliers sa labing una niining titulo sa miaging tuig.
Aduna pa’y duha ka mga tuig nga nahabilin sa kontrata ni Irving sa Cavaliers apan gusto ni Irving nga i- trade siya sa laing team ug usa sa mga nangahisgutan mao ang San Antonio Spurs.
Ang hangyo ni Irving gituohang usa sa mga rason kon nganong gustong kuhaon sa Cavaliers ang kanhi MVP pointguard nga si Derrick Rose.
Si Irving midayeg kang James sa pag-agak sa batanong puwersa sa Cavaliers ug daghan siyang nakat-unan gikan sa gitawag og King.
“He’s freaking awesome,” matod ni Irving. “As a student of the game, it would be a disservice to myself if I didn’t try to learn as much as possible while I’m playing with this guy. Every single day demanding more out of himself, demanding more out of us, the true testament of a consummate professional.”
Human napakyas ang Cavaliers sa finals sa miaging season batok sa super team Golden State Warriors, naglamano sila si James ug Irving dayon mingsaad og “We’ll be back.”
Apan daw dili na kini mahitabo ug mosubay na sa managlahing direksyon ang duha ka superstars.