315 BALAY NAUGDAW
2 KA SUNOG SA CEBU CITY, MANDAUE; 2 KA BOMBERO ANGOL
Di mominos 315 ka mga balay ang naugdaw ug apektado sa sunog sa dakbayan sa Sugbo ug dakbyan sa Mandaue kagahapon sa hapon ug parehong giisa sa general alarm ug Task Force Bravo.
Sa dakbayan sa Sugbo, si kanhi Konsehal Lea Japson, pangulo sa Department of Social Welfare and Services (DSWS), nagkanayon nga base sa ilang uwahing pag-ihap alas 5:05 sa hapon, niabot og 195 ka mga balay ang nakaon ug gikan-an sa kayo, 274 ka pamilya kon 1,221 ka individuals ang nawagtangan sa ilang pinuy-anan.
Gialarma ang sunog alas 12:14 sa udto ug nakontrolar sa alas 2:04 sa hapon diin tanang mga fire truck sa Metro Cebu ug kanait nga mga local government unit nipadala sa ilang mga fire truck.
Matod pa ni SF02 Alberto Jagdon nga nagagikan ang kayo gikan sa balay nga giukopahan sa ginganlan og “Jonathan” diin ang mga bombero nisusi pa og unsay tiunay nga tinubdan sa kayo.
Ang Bureau of Fire Protection (BFP) nipaubos sa sunog ilawom sa general alarm sanglit naglisod ang ilang mga bombero pag-penetrate sa lugar nasunogan gumikan sa kahagip-ot sa agianan, kakusog sa hangin ug nangahutdan og tubig.
Ang ilang mga fire truck hinungdan nga gisumpaysumpay sa mga bombero ang ilang mga hose sanglit dili na makagawas ang mga firetruck nga unang nakaresponde ug dili na usab makasulod ang bag-ong nangabot.
Gumikan sa kapit-os sa dalan A. Lopez ang ubang firetruck didto na niagi sa Quijano compound ug San Valley aron makapahiluna ug makapadangat sa ilang dala nga tubig.
Atol sa sunog, nagsunod lang og abot sila si Mayor Tomas Osmeña ug si kanhi Mayor Michael Rama.
Paglakaw ni Osmeña human nisusi sa lugar nga nasunogan, nibanos sab si Rama kinsa naila sa pagresponde sa mga kalamidad sama sa sunog atol sa iyang unom ka tuig nga pagdumala sa City Hall.
Matod pa ni Rama nga kaniadto, buot unta niyang ipa-reblock ang maong lugar apan wala kini madayon sanglit ang mga residente nisupak sa iyang plano.
TABANG
Si Nagiel Bañacia, pangulo sa local disaster risk reduction and management office, nipadala sa iyang mga tawo ug nikutay og suga sa palibot lakip na ang ilang basketbolan, nipadala og portable toilet.
Ang DSWS niapud-apod og libreng panihapon sa gatusan ka indibiduwal nga molanat hangtod sa tulo ka adlaw.
Matod pa ni Japson, nga posible pang mosaka ang gidaghanon sa mga balay ug pamilya nga apektado sanglit wala pa sila mahuman og ihap.
Sama sa naandan, ang mga pamilya nga nasunogan sa ilang balay makadawat og tag P20,000 gikan sa City Government lakip na ang housing materials.
MANDAUE CITY
Paglabay sa duha ka oras human pagkapawong sa kayo sa dalan A. Lopez sa Cebu City, niulbo usab dayon ang sunog nga niugdaw og di mominos 120 ka mga balay sa Sityo Lower Malibu, Subangdaku, dakbayan sa Mandaue.
Si FSSupt. Samuel Tadeo, regional director sa Bureau of Fire Protection (BFP7) kinsa gikan pa sa barangay Calamba ang niresponde didto sa Mandaue ug niisa sa alarma ngadto sa Task Force Bravo.
Ang mga firetruck gikan sa Cebu City niresponde didto sa sityo Malibu aron tabangan og pawong ang nagdilaab nga kayo nga nilamoy sa mga balay nga ginama sa ligth materials.
Ang Social Services Department sa Mandaue City Hall dali usab nga niresponde ngadto sa mga nasunogan aron maatiman ug mahatagan og pagkaon.
Hangtod sa pagsuwat ning balita, wala pa masuta kon pila ang danyos ug ang gidaghanon sa mga pamilya ug indibiduwal nga apektado sa katalagman sa Mandaue.