DUTERTE DAGHANG ‘PASIDAAN’
Pasidaan batok sa gidili nga drugas, Martial Law, illegal mining, kahiwian, rebellion, buhis ug uban pa ang unod sa ikaduhang State of the Nation Address ni Presidente Rodrigo Duterte kagahapon sa Batasang Pambansa.
Nilungtad og duha ka oras ang iyang Sona tungod sa iyang daghang adlib og dulan 70 ka rounds of applause gikan sa mga nanambong sud sa plenary hall sa Ubos Balay Balauranan.
Way bag-o sa unod sa iyang ikaduhang Sona nga nalitok na niini sa nangagi niyang mga pakigpulong.
Siya unang nipasidaan nga ipadayon ang hugot nga kampanya batok sa gidili nga drugas uban sa hagit ni United Nations special rapporteur Agnes Callamard nga makigdebate niya sa publiko subay sa pagpanaway niini bahin sa
human rights ug due process sa mga napatay nga gidudahang nalambigit sa gidili nga drugas.
Siya nanalipod usab sa iyang deklarasyon nga Martial Law sa pagtuo nga kini ang labing paspas pagsumpo sa rebelyon sa Mindanao, uban sa pasalig sa kasundalohan ug kapulisan nga nakiggubat sa mga teroristang Maute Group nga dili kini niya pasagdan.
Ang presidente niawhag usab sa Kongreso nga ibalik ang silot kamatayon sa nasod.
Si Duterte nimando usab sa mining companies nga mogasto pagpahiuli sa “virgini- ty” sa kalikupan kondili kini gustonga buhisan hangtod sa kamatayon.
Nahisgotan usab sa presidente ang gihambin nga colon cancer ni Communist Party of the Philippines founding chairman Jose Maria Sison.
Si Duterte namulong nga dili na siya makigsabot alang sa kalinaw tali sa mga rebeldeng Komunista.
Ang presidente niawhag usab sa Estados Unidos nga ibalik ang Balangiga bells sa Pilipinas nga gikuha sa United States Army gikan sa simbahan sa lungsod sa Balangiga, Eastern Samar atol sa Philippine-American War.
Si Duterte nihangyo sa publiko nga mokooperar sa iyang administrasyon batok sa kahiwian pinaagi sa pagtawag sa 8888.
"I cannot stop corruption if you do not cooperate," dugang niini.
Siya nihagit sa publiko nga nganlan ang mga publikong opisyal ug ang mga sala nga nahimo niini.
Nahisgutan usab niya ang kabahin sa temporary restraining order (TRO) nga makapalangay sa mga proyekto sa gobiyerno.
Suma pa niini ang labing ubos nga bid sa gobiyerno nag-promote og kurapsyon.
Si Duterte nipahibawo usab nga usbawan niya ngadto sa P1 bilyon gikan sa P400 milyones ang assistance alang sa overseas Filipino Workers, dungan sa pag-ila sa ilang dakong papel sa ekonomiya sa Pilipinas.
Siya niawhag sa Kongreso nga i-review ang Procurement Law labi na ang pagpalit og ekipo alang sa mga ospital. Ang presidente namulong nga palapdan usab ang health insurance coverage alang sa mga indigent.
Si Duterte nihangyo usab sa Senado nga ipasar ang tax reform bill nga unang napalabang sa Ubos Balay Balauranan.
Siya nidugang nga hugtanon usab gigukod sa Bureau of Internal Revenue ang mga tax evader.
Ang presidente niangkon nga bully siya batok sa mga kaaway sa estado.
Matod niya sa dili madugay tukion ang pederalismo.
Sa dayong tapos sa iyang Sona, si Duterte niduso sa P3.767 trilyones nga gisugyot nga pundo alang sa 2018.
Human sa iyang Sona, nakig-atubang siya sa mga raliyesta ug gipamati ang ilang mga sentimento. /