BOHOL ALERTO BATOK MGA NPA

Giisa karon sa Police Regional Office (PRO) 7 ang alert

status lukop rehiyon human makadawat og intelligence

report nga dunay presensya sa mga armado nga nangabot sa lalawigan sa Bohol sakay sa usa ka motor banca.

Ang impormasyon mikatap sa social media gani gipahimangnoan ang mga residente sa kabarangayan nga motaho kun dunay mga armado nga masigpatan.

Tungod niini gipaalerto ni Gobernador Edgar Chatto ang mga lungsod pagbantay og itaho dayon sa kapulisan kun duna silay mamatikdan sa ilang tagsa-tagsa ka mga lugar.

Giangkon usab kini ni PRO 7 director Jose Mario Espino nga nakadawat usab siya sa samang impormasyon apan kinahanglan pa kini nga subayon sa iyang mga sakop kun unsa ka tinuod.

Usa sa iyang kamandoan sa iyang mga sakop nga pahugtan ang ilang pagbantay ilabi na sa mga coastal area sa lalawigan sa Sugbo sanglit labing duol ang Sugbo sa Negros nga giila nga dunay daghang presensya sa New People’s Army.

Mipahugot pa ang kapulisan sa Sugbo nunot sa bag-ong insidente sa pagpamanhig sa mga rebelde sa siyudad sa Guihulngan, Negros Oriental diin daghang pulis ang namatay.

Gipangandaman nila ang posibling pag-abot sa mga rebelde dinhi apan positibo ang heneral nga mabantayan ra kini sa kapulisan nunot sa aktibong pakig-alayon sa katawhan.

“May mga information tayong natanggap but kailangan pa nating i-validate kasi intelligence information pa ito,” matod ni Espino.

Naleksyon na ang kapulisan sa nahitabong pagbanhig patay sa mga sakop sa Guihulngan PNP diin usa sa ilang tun-an pagbalik ang police operation procedure aron di na masubli pa ang nahitabo.

Napanglantawan nga dunay ilusad nga pagpangatake ang mga rebelde nunot usab sa pagsuspenso sa kasabutang sa kalinaw sa grupo.