6 menor, 1 hingkod gidakop sa rambol

Unom ka mga menor ug usa ka hingkod ang nasikop sa kapulisan sa dakbayan sa Mandaue human nagrambol sud ug gawas sa diskohan didto sa Opao gym, sa dakbayan niadtong Dominggo sa kadlawon.

Nagtingkagol karon sa prisuhan ang duha ka grupo sa mga menor nga nag-isig rambol sa duha ka managlahing dapit sa samang adlaw.

Matod ni SPO2 Juan Calamba sa Station 5 sa Mandaue City Police Office nga giandam na nila ang mga affidavit alang sa pagkiha sa mga menor nga nihimo og kasikas niadtong Dominggo.

Duha sa mga suspek nga menor nakuhaan og tag usa ka armas, duha ang nakuhaan og batanggas nga kutsilyo samtang laing duha nakuhaan og tag usa ka pakite sa gituohang shabu.

Unang nasikop kapulisan ang upat ka mga menor didto sa Gerado Ouano St., Barangay Opao.

Nasikop sa kapulisan sa Station 5 sila si Richard (di tinuod nga pangan), 16, taga Basak Mercado, dakbayan sa Lapu- Lapu, Mike (di tinuod nga pangan), 16, taga Sitio Pokang, Looc, Mandaue, Vince (di tinuod nga pangan), 17, taga Sitio CCF Brgy. Umapad ug Alan (di tinuod nga pangan), 16, taga Purok Tambis, Brgy. Umapad.

Si Richard nakuhaan og usa ka 357 paltik revolver nga may duha ka buhing bala, si Mike sa laing bahin nakuhaan og usa ka pakite sa gituohang shabu samtang si Vince ug Alan nakuhaan og mga kutsilyo.

Kapin usa ka oras ang nilabay, nasikop usab ang laing duha ka menor kuyog sa usa ka hingkod didto sa dan Plaridel, Brgy. Umapad sa dakbayan.

Sumala ni Calamba nga gikan nanisko ang mga suspek nga si Alvin Bacalla, 18, taga Dumlog Talisay City, Amir (di tinuod nga pangan), 16, taga Zone Ahos, Brgy. Paknaan ug Aljun (di tinuod nga pangan), 17, taga Brgy. Labogon.

Nakuhaan og usa ka pakite sa shabu si Bacalla sumala ni Calamba samtang usa ka caliber 22 black widow paltik ang nakuha gikan ni Amir.

Si Aljun sa laing bahin nakuhaan og mga drug paraphernalia nga foil strips ug lighter.

Nasuta ning mantalaan gikan ni Calamba nga ang mga grupo halos kada semana magrambol sa dapit.

Gani sa milabayng semana, 21 ka mga batan-on ang nasikop sa ilang buhatan human naglinabayay og bato sa dan nga nisangpot sa pagka-igo sa windshield sa usa ka jeep.

Nakagawas ra hinuon ang mga batan-on human gipangkuha sa ilang mga ginikanan ug nibayad sab kini sa danyos sa jeep.

Ang mga menor nga suspek gikatakdang mag-atubang og kasong kalapasan sa illegal possession of firearms ug paghupot og ilegal nga drugas, matod ni Calamba.