Mental problem

Niining mga nangaging mga adlaw, makadaghan kita makadungog ug mga balita kabahin sa suicide. Adunay usa ka 19 anyos nga single mother ang nagtubok sa iyang kaugalingon pinaagi sa pagbitay atubangan sa Facebook live. Usa ka estudyante sa Argao nagtubok gihapon sa iyang kaugalingon ug gugma ang hinungdan.

Usa ka retired employee sa usa ka broadcast network ang nag- suicide usab ug gi-ingon nga health problem ang hinungdan. Kasagaran sa mga hinungdan mao ang problema sa relasyon sa bana ug asawa o manag-uyab. Problema sa pinansiyal ug kahimtang sa panglawas labi pa kadtong naghambin ug dili na maayo nga balatian. Pero angayan bang kutloon ang atong kaugalingong kinabuhi kon pananglitan makasugat ta niining maong matang sa mga problema? Well, hinuon dili man kita makasimba ug makakalawat sa huna-huna sa uban. Pero matod pa lagi sa panultihon nga ang matag problema aduna gyuy solusyon kon ang hingtungdan malihok ug makamao lang mangita og kasulbaran. Ipahungaw sa mga higala ug kabanay o ikonsulta og mga experts ingon man spiritual advisers ang imong problema sa ingon nga makatabang sila pagpangita og solusyon.

Apan ang grabe mao ang duguon nga hitabo niadtong miaging adlaw sa Valladolid, Carcar City diin usa ka dismissed policeman mipatay sa iyang asawa ug duha ka mga anak gumikan sa problema. Si kanhi PO1 Joel Lopez, kinsa na- dismissed gumikan sa kaso niadtong 2013, nagpakamatay pinaagi sa pagpusil sa iyang kaugalingon human usab niya pamusila ang iyang asawa nga si Jelyn, 36, ug 2 ka mga anak nga nagpangidaron ug 12 ug 8. Gigamit sa pulis ang usa ka armalite rifle. Iya siguro kadtong isyo nga iyang gitaguan.

Human ma- dismissed si Lopez nawala kini ug halos usa ka tuig sa iyang pamilya. Sa pagbalik niini, siya na ang nag-atiman sa iyang mga anak sa eskuwelahan ug tighatud-kuha sa iyang asawa nga nagtrabaho sa usa ka pawnshop sa usa ka mall sa Carcar. Naburyong na siguro ang maong pulis hinungdan nga nakahimo sa maong krimen. Problema lang kay iyang giamong ang iyang pamilya. Makapahinuklog.