Ambush sa Guihulngan

Nakontrobersiya karon ang konsehal sa Guihulngan City nga si Edison de la Rita kinsa maoy unang giambush sa mga rebelding New People’s Army (NPA) niadtong Biyernes didto sa Barangay Magsaysay, Guihulngan City, Negros Oriental sa wa pa atakiha ang unom ka mga pulis kinsa miresponde sa maong hitabo.

Kini human mikatap karon ang huhungihong nga posibling gikansubo ang konsehal sa mga rebelde aron mapatay ang mga pulis atol sa pag-ambush.

Alas siete sa buntag unang gi-ambush ang grupo ni de la Rita kinsa luwan sa usa ka motorsiklo nga gi-eskortan og tulo ka pulis nga sakay sa patrol car.

Nakaipsot si de la Rita ug ang iyang driver sa motorsiklo apan ang mga pulis nga anaa sa patrol car giingon nga nakig-gubat sa pipila ka mga sakop sa NPA sulod sa pipila ka minutos. Ang laing body guard sa konsehal giingong napatay.

Si de la Rita maoy nanawag sa usa ka empleyado sa City Hall kinsa maoy misumbong ngadto sa kapulisan.

Pinangulohan sa ilang hepe nga si Supt. Arnel Arpon, ang 15 ka mga pulis daling miresponde apan wa pa gani sila maabot sa ilang destinasyon sila na usab ang gibanhigan sa mga rebelde ug pito kanila ang patay, lakip na ang hepe.

Kon basehan ang senaryo, dili man tuod nato masalikway kining maong pangagpas nga posibling nagamit si de la Rita sa mga rebelde, apan dili usab makiangayon ang dinaliang pagtumbok nga nakigkunsabo siya niini.

Posibling gipahimuslan usab sa mga sakop sa NPA ang sitwasyon ug gihimo kini nilang stratehiya aron mapatay ang mga pulis.

Kini maoy laing angulo nga susihon, kay dili gyud hinuon lalim nga ikaw pay gibanhigan unya ikaw pay himuong dautan, apan labaw pang salikwaot tan-awon nga kon ikaw anaa sa gobiyerno nagserbisyo, apan atoa diay sa pikas ang imong simpatiya.