Uber ug Grab mga colorum?

Dunay mga 41,000 ka accredited drivers ang Uber ug Grab sa tibuok nasud. Apan 3,700 lang ang dunay pagtugot sa LTFRB nga maka-operate. Buot ipasabot, ang 37,300 mga colorum?

Nakasabot kita nganong gusto sa kagamhanan nga ma- regulate ang mga sakyanan ug drayber sa Uber ug Grab. Mas maayong patas ang pagtagad sa kagamhanan sa mga taxi ug kining bag-ong mga serbisyo nga naggamit na sa Internet.

Apan, nisanay sab kining Uber ug Grab tungod sa mga wa pa masulbad nga mga suliran sa transportasyon labi na sa mga taxi.

Unsaun man sab gyud nga daghan man ang mga abusadong drayber sa mga taxi? Ikadaghan na ko makasinati niining mga klase sa mga abusadong drayber. Motukar ni sila sa panahon sa ulan ug kining tingsweldo.

Makasabot ko sa kalagot sa mga pasahero. Lami gyud motuok og drayber nga mamili og pasahero dayon modemanda og dakong kantidad.

Mao kini ang rason nganong last resort na nako ang mosakay og taxi. Nakat-on na ko mosakay og Uber kon dili Grab dinhi sa Sugbo ug sa kaulohan.

Lalim bay, sa miaging semana nga didto ko sa kaulohan, moabot lang og P110 ang akong nabayran sa Uber gikan sa akong hotel sa Timog padulong sa Cubao. Apan dihang nisakay ko og taxi gikan sa mas duol nga SM Caloocan padulong sa Timog, gituyok ko sa kanahang drayber og niabot og P163 ang plete.

Gawas kanako, daghan gyud ang nakauyon mao nga nisanay kining mga gitawag og TNVS nga mao ang Uber ug Grab.

Bisan pa man, nakasabot kita sa katuyu-an sa kagamhanan.

Gihangyo ni Transportation Secretary Arthur Tugade ang mga Uber ug Grab, nga gitawag og transport network vehicle services (TNVS), nga motuman sa mga gikinahanglan sa kagamhanan. Lakip na niini mao ang financial statements ug income tax returns.

Sa pagkakaron, mga 11,000 lang ang dunay pending franchise applications. Saun na man lang ang 20 mil kapin nga mga drayber sa Uber ug Grab?

Apan unsaon man sab pag- apply kon ang kagamhanan dunay moratorium sa pag- issue og mga prangkisa alang niining mga app-based services?

Sa akong panahom, mas maayong mangita ang kagamhanan og win-win solution aron mabulahan ang publiko ug di moinsister nga pit-on hinuon kining mga TNVS.

SONA

Sunod semana na akong makakomentaryo kabahin sa State of the Nation Address (SONA) ni Presidente Rodrigo Duterte kay sayo ang atong

deadline sa Superbalita. Bisan pa man, samtang dako ang kalampusan ni Duterte batok sa iyang numero unong gubat batok sa drugas, di nato malimod nga wa pa gyud siya makaangkon og hingpit nga kadaugan human sa usa ka tuig.

Gani, nibalik na ang drugas sulod mismo sa Bilibid nga gipabantayan og mga sakop sa SAF.