Mingaw ang pasko sa Mindanao?

Gipatas-an. Hangtud pa sa Disyembre, o sa katapusan ning tuig 2017 ang Martial Law sa Mindanao. Gi-aprobahan sa Kongreso niadtong Dominggo sa ilang espesyal nga inusa nga sesyon.

Napulo ug unom ka senador ug 245 ka kongresista ang miboto nga patas-an pa ang Martial Law sa Mindanao kutob sa Disyembre.

Ang 60 ka adlaw sa primero nga martial law natapos niadtong Sabado.

Nangayo si Presidente Duterte sa Kongreso nga pataspa martial law sa Mindnao basi sa sugyot sa militar tungod kay wa pa matapos ang gubat batok sa terorista nga Maute, Abu Sayyaf ug BIFF (Bangsamoro Islamic Freedom Fighters).

Morag mingaw unya ang pasko sa Mindanao kay ubos pa man gihapon sa Martial Law. Bisan tuod naa ra Marawi City ang gubot apan ang sa entero Mindanao ang Martial Law.

Sige na lang, matud pa sa akong amigo nga taga Mindanao, bisan og mingaw ang Pasko sa uban dapit sa Mindanao basta mahuman lang ang problema sa Marawi city, nga maoy balwarte sa Maute.

Armed Forces of the Philippines Chief-of-Staff General Eduardo Año, ang implementor sa martial law, miadmitir nga iyang girekomendar ni Presidente Duterte nga patas-an pa ang martial law, aron pagseguro nga di na mausab ang nahitabo sa Marawi city.

Si Defense Secretary Delfin Lorenzana mipasabot usab sa mga magbabalaod nga ang ilang gihangyo nga 150 ka adlaw nga martial law human napupus ang 60 ka adlaw niadtong Hulyo 22 aron sa pagseguro nga way magpirmi nga terorista sa atong nasud.

Matod pa ni Lorenzana, ilang gikinahanglan ang 150 ka adlaw aron usab pagsugpo sa Abu Sayyaf nga nagsige og pangidnap og turista nga langyaw nga og di makabayad sa ransom putlan sa ulo.

Maayo kay nakasabot sa sitwasyon sa Marawi city ug sa tibuok Mindanao ang mayoriya sa mga senador ug kongresista ug wa malangay ang pag-aprobar sa extension sa martial law.

Uyon ko sa martial law apan kutob lang unta sa Marawi city o di ba sa ARMM kon Autonomous Region of Muslim Mindanao aron di maapektohan ang turismo ug negosyo sa mga dapit sa Mindanao nga way gubot.

Sa laing bahin, sakit hunahunaon nga samtang naproblema ang atong kagamhanan sa gubat sa Marawi city, ang NPA nagpahimus usab. Niadtong Dominggo, unom ka pulis ug usa ka sibilyan ang napatay dihang giambush sila bukiran sa Sitio Mandie, Barangay Magsaysay, Negros Occidental.

Nangandam man unta ang atong kasundalohan ug kapulisan sa NPA human napakyas ang peace talks apan sipyat lang gihapon. Manghinaut ta nga di mausab ang nahitabo sa Gihulngan. Akong pahasubo sa mga nailo sa ambush.