Panahon pa ni Elvis Presley
Angay tingali elementary pa lang ato nang isilsil sa alimpatakan sa kabataan ang makalilisang nga epekto sa druga ug unsaon aron dili sila masugamak.
Dapat ang Department of Education ang mangulo pinaagi sa pagbutang og bag-ong subject nga mutisok sa linghud nilang salabutan.
Ang paghikog sa singer sa Linkin Park sa miaging semana ug ang pagpakamatay sa singer sa Soundgarden niadtong Mayo nagpakita nga wa gyuy maayong laki sa maong bisyo.
Nadugang sila sa nagkataas sa listahan nilang Elvis Presley, Jimi Hendrix, Kurt Cobain, Heath Ledger, Michael Jackson, Whitney Houston ug iyang anak ug daghan pa kaayo nga puros namatay sa druga.
Mao nang panahon nang i-apil ang subject sa mga tinun-an ang bahin sa illegal drugs aron modako silang dunay kahadlok ug pagtahud sa kabalaanon sa kinabuhi. Kay ang mga dagko lisud nang usbon kon mao na gyuy ilang kultura.
Basin pa sa sunod nga henerasyon makakita na ta og lig-ong pundasyon sa katawhan nga dili basta dali mabanlas panahon sa unos ug tentasyon.
Wish ko lang!
DILI RAPE?
Nakabasa kog mga reaksyon sa social media nga dili diay kuno rape ang kaso sa Tawag ng Tanghalan first grand champion Noven Belleza kundi sexual assault ra kay wala may penetration nga nahitabo.
Apan matod sa Public and Standards editor sa Sun.Star Cebu Atty. Pachico A. Seares nga rape gihapon.
“Not rape by carnal knowledge but rape by sexual assault, the second kind of rape under the expanded law.”
Ang pangutana karon kon makabangon pa ba kaha si Noven sa iyang career? Hasta ang giingong biktima makabalik pa kaha sa iyang normal nga kinabuhi karong daghan na ang nakaila niya sa social media?
Ngano pud gipasagdan ra man nila molaag si Noven sa disoras sa gabii nga di man to suweto sa Cebu. Kahibawo silang probinsyano ug way kabangkaagan. Asa diay ang iyang handler sa maong hitabo? Asa ang iyang manager?
KUSOG DIAY
Nindot og feedback ang mga nakakita sa “Kita Kita” nilang Empoy Marquez ug Alessandra de Rossi.
Duna say mga nag- post sa ilang Facebook nga mixed emotion sila kay kataw-anan ug makahilak kuno.
Giingnan ko sa taga-Viva nga tan-aw dayon kay basin i- pull out na. Pero naabtan man og usa ka semana, sa ato pa, kusog. /