The time you say I love you
Taudtaod gyud nakong gitutokan si Maggie. Mihunong kog kaon ug miinom sa akong softdrinks. Seryuso si Maggie nga nagtan-aw sab nako.
“Samot nga di nako sugton si Cliff, Mags. Bestfriend gud ta ug love mo siya.”
Mikatawag hinay si Maggie. Mikidhat siya nako.
“Ayaw ko himoang rason, uy, Rona, sa pagsugot mo kang Cliff. Accept na man sab nako nga di mi para sa usag usa. Again I tell you, ikaw ang iyang love. But tell me the real score sa imong feeling niya, bi. Love mo siya, no?” Nakapangawot ko sa akong ulo. Naglisod kog tubag kang Maggie. Naghilom na lang ko.
“Silence means yes, di ba, Ron?”
“Well, ipokrita ko kon mamakak ko nimo, Mags. Yes, nakagusto sab ko kang Cliff. Pero di man ang akong kasingkasing ang gitagaan kog bili, uy. Ang akong utok. Kon sabton gyud pag-ayo, di ko angay mahigugma kang Cliff tungod sa iyang kinaiya. Good future? Wa siya ani, Mags. And you know the reason.”
Miyangu-yango si Maggie. Mikidhat na sab siya nako.
“Basig mausab siya kon sugton mo siya, Ron.” “Kon mahitabo na, well, I
will happy. But sa akong tanaw niya ron, mas gusto niya ang paglingaw-lingaw uban sa iyang mga barkada. Wa siyay pagtan-aw sa iyang maayong kaugmaon pinaagi sa pagtinarong sa pag-eskuwela.” “Let’s watch and see na lang, uy, Ron.”
Mipakibo na lang ko sa akong mga abaga. Nakahuman na mig paniudto niadtong tungora. Nanggawas mi sa suki namong karenderya ug namalik sa eskol.
“Dugay-dugay pa man ang atong klase, Ron. Mangadto ta sa library kay duna ra ba tay assignment sa una natong
subject sa hapon.” “Tuod, no. Nakalimot na man lang nuon ko. Sige, mangadto ta.”
Human namog research ni Maggie sa library, nanggawas dayon mi ug nangadto sa among classroom. Nasugatan namo si Cliff.” “Hi!” Mitimbaya dayon siya nako. Nindot kaayo siyag pinahiyoman.
“Hello!” Mitimbaya sab ko kang Cliff apan gingisloan ko lang siya. It means nga wa koy dasig nga nakig-atubang niya. Unya nananghid si Maggie nako nga mouna lang siya sa pag-adto sa among classroom. Apan miagpas ko niya kay gusto kong molikay kang Cliff.