Conservative
Dear Noy Kulas,
Just hide my true name. Call me Purin, 28 years old na. Karong panahona, maglisod tingali pagtuo ang mga tawo nga sa akong edad virgin pa ko nga pagkalalake. Tinuod ni kay I believe nga mas maayo ang sex himuon sud sa marriage. Mangatawa ang akong mga barkada kay bisan 16 years old pa sila, duna na silay experience sa sex. Samtang ako, kiss ra kutob kay di ko gusto nga mohilabot sa babaye nga di pa nako asawa.
Giingnan ko sa akong mga barkada nga mas maayo pang magpari ko kay nasobraan ra ko sa ka buotan. Ako silang giingnan nga tungod lang sa akong pagtan-aw parte sa sex nga conservative ko, wa ni magpasabot nga gusto kong magpari. Ang ako kay I believe nga ang sex himuon lang within marriage. Ambot, Noy, basin tungod ba aning akong pagka conservative, basin mao ni ang cause nga mabuwagan ko og uyab.
Nakauyab na ko og mga single mother nga mao pa ang manghagad pero akong balibaran. Ingnon tawon ko nga bayot but ang tinuod nga rason kay di ko gusto makasala. Moangkon ko nga deeply religious ko nga pagkatawo. Sakto kaha ning akong gibuhat? Di ba kaha mao ni ang di ganahan sa mga babaye sa akoa, kining akong pagka conservative. Unsa may imong tan-aw, Noy. PURIN Purs,
Sakto baya sab nang imong gibuhat. But sadly, sa panahon karon, ang tan-aw sa mga tawo sa mga lalake nga sama kanimo, bayot or silahis kay daghan sa mga lalake karon, basta makakitag kahigayunan, ang babaye ila dayong labkan. Moatik man gani sa bisan unsa nga paagi aron lang madani ang babaye. But para nako, maayo ra sab nang imoha kay di ka masugamak sa babaye nga di diay maayo nga himuon nga asawa. Di usab tingali ang imong pagkakonserbatibo ang hinungdan nganong mabuwagan ka og babaye. Basin tungod sa imong ka serious, ma bored sila nga ikakuyog ka. Kuwang ka sa life nga ikaestorya.
Pagkat-on sa pagpakatawa sa babaye. Kanang di sila mapul-an nga makigkuyog ug makig-estorya nimo. Usa ni sa mga kalidad sa lalake nga ganahan sa mga babaye. Ayaw anang nasobraan ka ra ka serious kay magsige og panghuy-ab ang imong mauyab ana. Kon unsay imong gituohang sakto, barogi. Ayaw pagpadala sa mga estorya. NOY KULAS
(Alang sa imong problema, e-mail sa kulassuper@sunstar.com.ph ug rojval69@ yahoo.com)