Komedya sa gugma

Naghigda na si Nadine sa iyang kama aron matulog dihang nabati niya ang tunog sa iyang selpon nga diha sa ibabaw sa ‘headboard' Iyang gipunit. May‘call.' Iyang gipislit ang ‘phone icon’ nga berde. “Hello!” timbaya niya samtang mitan-aw sa ‘alarm clock’ didto sa ibabaw sa iyang tokador, Alas nuybe pasado na sa kagabhion.

“Nadz, good evening!” tingog sa lalake; kang Phillip. Sinati niya ang tingog ni Phillip nga iyang ‘textmate.’’ May pagka bayote ang tingog niini.

“O, what’s up, Phil? Nganong nanawag ka? Katulgon na ko,” tug-an ni Nadine.

“Mitawag ko kay di man ko makatulog nga naghunahuna nimo!” ni Phillip.

“Ha? Di ka makatulog?” ni Nadine nga mingisi. “Sayon ra na, Phil. Aron di ka makahunahuna nako, count a thou- sand sheeps nga nangambak sa koral. Di pa gani ka kaabot og tulo ka gatos, pikloy na imong mga mata.”

“Magkita ta bi. Gusto na lagi kong makigkita nimo personally,” ni Phillip.

“Di lagi ko makigkita nimo. Gitug-anan tika nga duna na koy uyab. Basin og makit-an ta niya. Kon buwagan ko niya, maypa matay! I love him very much ra ba!”

Si Brett uyab ni Nadine. Tulo na ka tuig ang ilang panaghigugmaay. Duha na ka higayon nga misakna si Brett kang Nadine nga mo- check in silag motel, apan midumili si Nadine. Apan niadtong miaging buwan wala na siya makabalibad. Misugot siya nga manulod sila sa motel.

Paglabay sa duha ka buwan namatud-an ni Nadine nga mabdos siya. Sa daghang higayon gitawagan niya si Brett sa selpon aron pahibaw-on niini, apan wala kini motubag. Nakahilak siya. Usa ka gabii samtang naghilak si Nadine sa tago, mitunog ang iyang selpon. Si Phillip. Gisultian niya kini nga mabdos siya.

“Ha? Buntis ka? Hala! Di man na gamay problemaha, dako man na kaayo! Gusto ko makigkita nimo, Nadz.” ni Phillip “Andam ko nga mahimong ‘savior of the world’ kon di siya mangako sa iyang responsabilidad.”

Nagsabot sila nga magkita sa patyo sa Katedral inigka ugma sa alas singko sa hapon. Ug nagsabot sab sila sa mga sapot nga ilang isul-ob.

PAGKA UGMA paghiabot ni Nadine sa Katedral midiretso siya sa patyo. Nakita niya didto sa usa ka lingkuranan ang usa ka lalake nga nagsul-ob og puwa nga T-shirt. Nagtalikod kini. Wa siya magduhaduha. Si Phillip. Iyang giduol.

“Phil, ganiha ra ka?” pangutana ni Nadine.

“Bag-o lang,” ni Phillip sa tuno nga pinaluray, dayong lingi kang Nadine.

Nahimut-okan si Nadine. Nanagko ug misiga ang iyang mga mata. Daw dili siya makatuo sa iyang nakita.

“Brett?! Ikaw?” nahasinta si Nadine. Ang duha ka hamtong nga mga babaye nga naglingkod sa lingkuranan duol sa gilingkoran ni Brett nahatankaniya.

“Ako, Hon. Si Phillip ug ako usa ra,” tug-an ni Brett nga mitindog ug mikupot sa mga bukton ni Nadine. “Duha ka selpon akong gigamit nga lainlain og SIM.”

“Apan, Brett, nganong nangomedya ka man og ingon niini?” ni Nadine nga kahilakon..

“Aron pagmatuod nga ikaw gayod ang akong pakaslan, may ihatag ko kanimo,” ni Brett nga may gikuot sa bulsa sa iyang maong nga karsones, engagement ring. Dayon miluhod siya sa atubangan ni Nadine. “Will you marry me?” kusog nga namulong si Brett.

“Yes, Hon! Yes! Yes! I will marry you!” ni Nadine nga luhaan ang mga mata.

Mitindog si Brett ug gisul-ot sa tudlo ni Nadine ang ‘ engagement ring.’ Unya gipatikan niyag halok ang mga ngabil ni Nadine. Ang mga tawo nga diha sa ilang duol nga nakasaksi sa maong esena sa gugma, namakpak.

(KATAPUSAN)