CESAFI ANDAM NANG MOSUGOD SA AUG. 5
Andam na ang tanan alang sa pagpahigayon sa 2017 Cebu Schools Athletic Foundation (Cesafi) basketball event nga sugdan karong Agusto 5 sa Cebu Coliseum.
Kagahapon, ang opisina ni Commissioner Felix Tiukinhoy Jr. nagpadala na og pinal nga mga line-up sa tanang partisipanteng teams sa media pinaagi sa email human sa screening sa miaging semana.
Nagkanayon si Tiukinhoy nga pipila lang ka mga magduduwa ang nanga-disqualify ning higayuna.
Giangkon ni Tiukinhoy nga wala pa kaayo siya’y tantong ideya kon unsa’y malauman nga mga kombati ning tuiga basi sa line-up sa matag teams apan usa ang labing segurado – kulbahinam ang mga aksyon.
Dili ikalimod nga inilog gihapon ang defending champion University of the Visayas (UV) Green Lancers sa college
division hilabi na kay nakadugang pa kini og mga haligi sa ilang puwersa.
Apan gilauman nga mas lisod ang mga dalan nga agion sa Green Lancers sa ilang kampanya sa pagdepensa sa korona.
“Ato pa ning tan-awon kay ang ubang teams nagpalig-on man sa ilang line-up,” matod ni Tiukinhoy.
Gawas sa Southwestern University ( SWU) Cobras ug University of San Carlos (USC) Warriors, nga mao ang higpit nga karibal sa Green Lancers sa nanlabayng katuiga, dili na sab mabintahan ang University of Cebu (UC) Webmasters ug University of Southern Philippines Foundation (USPF) Panthers.
Ang Webmasters giyahan na ni multi-titled coach Raul “Yayoy” Acoseba, kinsa naila nga lisod buntogon kon basketball na sa Sugbo ang hisgutan. Sa labing unang higayon sukad masukad, ang Webmasters nagkuha og import.
Sa ilang bahin, ang Panthers ni coach Albert Alocillo aduna sa’y import nga giingong maoy makaagak kanila gikan sa dungog nga “pildihunon na’ng daan” sa liga.
Ang Green Lancers, Webmasters ug Panthers mao ra ang adunay import ning tuiga.
“Ang USP karon dili na gyud makompiyansaan. Tan-aw nako karon nga season, nindot ang mga duwa kay balance ang
teams,” asoy ni Deputy Commissioner Danny Duran.
Sama sa naandan, ang University of San Jose Recoletos (USJ-R) Jaguars magpabilin gihapong dili makompiyansaan ubos sa paggiya sa beteranong
coach nga si Jun Noel. Ang Cebu Insitute of Technology University (CITU) wala ra’y langas sa offseason apan dili bastabasta matay-og ang determinasyon niini nga makamugna og surpresang kadaugan sa matag duwa.