2 samdan sa pagpamusil

Duha ka tawo ang nasamdan human gipamusil sulod sa ilang gisakyang awto sa dalan Pelaez, Barangay Kamagayan, dakbayan sa Sugbo, pasado alas 3:00 kaadlawon kagahapon.

Usa ka tawo sakay sa motorsiklo ang gitumbok nga responsabli sa pagpamusil.

Ang mga nasamdan mao sila si Kharel Ravina, 24, ug Gamaliel Masong, 36, taga Sityo Tabay Lawom, Baranay Labangon.

Sa pasiunanga inbestigasyon ni SPO1 Winston Ybanez sa Homicide, gikan nag-inom ang mga biktima uban sa ilang mga higala sa Dark Planet sa dalan Pelaez.

Kalit lang nga ila gikalalis ang grupo sa suspek nga miresulta sa lamoklamok, apan wa magdugay nauwang.

Nakadisidir ang grupo sa mga biktima nga mamauli ug misakay sa Honda hatchback blue ang kolor may platet number YDY 123 ug mipalayo sa dapit.

Apan gisundan sila sa usa ka motorsiklo ug wa magdugay nadungog ang sunodsunod nga boto ug parehong naigo sa ulo sila s Ravina ug Masong.

Bisan pa man ug nangaigo na ang mga biktima, padayon sila nga gisundan sa angmotorsiklo hangtud nga naabot sila sa Barangay Tisa ug midangop sa Barangay Hall.

Daling nakabiya sa dapit ang nagmotorsiklo ug ang mga biktima gidala sa tambalanan.

Atol ning pagsuwat, krtikal ang kahimtang ni Ravina ug luwas na sa delikadong kahimtang si Masong.

Ang maong kaso gisubay karon kapulisan.