Angkas paluyohan ni Tomas bisan ilegal ang operasyon
Bisan kon nakasupak sa balaod, padayon nga suportahan ni Mayor Tomas Osmeña ang Angkas, usa ka aplikasyon nga mahimong makasakay ang pasahero sa motorsiklo pinaagi sa internet sama sa Uber ug Grab.
Ang Land Transportation Franchising and Regulatory Board (LTFRB) nihulagway sa matang sa transportasyon nga ilegal o colorum sanglit ang motorsiklo way prangkisa, sama sa mga habalhabal nga namasahero.
Apan ang panan-aw ni Osmeña lahi ug matod pa niya kinahanglan nga mosagop sa mga bag-ong uso sanglit iyang nakita nga karaan na ang gisubay sa gobiyerno.
“In the interest of public welfare, we are going to pursue this. We all know that habalhabal is accepted practice here,” pasabot sa mayor.
“I will do what's good for the people, they (LTFRB) will do what's bad for the people. That's the way I look at it, do not use the law to implement something that's bad for the people,” dugang ni Osmeña.
Gipadayag niya nga kon moabot ang higayon nga magkasumpaki ang Angkas ug LTFRB, adto siya modapig sa katawhan.
Gipahibawo ni Osmeña nga gimanduan niya ang mga personnel sa City Traffic Operation Management (Citom) sa di pagdaginot sa mga motorsiklo sanglit alang niya di kini maoy prayoridad ug di usab kini ang problema sa trapik.
Gipaambit sa mayor nga nagunang katuyoan sa Citom mao ang pagpahapsay sa dagan sa mga sakyanan ug kon adunay mga badlungon ilabi na four wheeled vehicle, iya kining paisyuhan og violation.